《客語白話字聖經試讀版》

 | | | 轉寄

Yok-hon Fuk-yîm, Thi-17-tsông Yâ-sû Vi Ho̍k-sâng Khì-tó

作者 Hak-ngî Sṳn-kîn 2009.07.26

約 17:1 Yâ-sû kóng-liáu liá-têu fa, tshiu ngo-thèu hiong thiên, kóng: “Â-pâ á ! Sṳ̀-heu to lé, ngien Ngì yùng-kông Ngì-ke Lai-é, pûn Lai-é ya-voi yùng-kông Ngì;
約 17:2 Ngì yû tsiông tshṳ-lî tshiòn-ngìn-lui ke khièn-piang su pûn Kì, sṳ́ Kì tsiông yún-sên su pûn Ngì só kâu-thok Kì-ke ngìn.
約 17:3 Yún-sên tshiu-he ngin-sṳt Ngì he vì-yit ke tsṳ̂n-sṳ̀n﹍Song-tsú, lâu Ngì só tshâi-khién ke, tshiu-he Yâ-sû Kî-tuk.
約 17:4 Ngài yí-kîn vàn-sṳ̀n Ngì só kâu pûn Ngài hàng ke sṳ, tshiu-he tshai thi-song yùng-kông Ngì.
約 17:5 Liá-ha, Â-pâ â ! Ngien Ngì su Ngì yû ke yùng-kông, tshiu-he màng yû sṳ-kie tsṳ̂-tshièn, Ngài lâu Ngì thùng-tshai só-yû ke yùng-kông.”
約 17:6 Ngì só pûn Ngài tui sṳ-kie tho̍k-tshut-lòi ke ngìn,Ngài yû tsiông Ngì-ke miàng hién-mìn pûn kì-têu tî; kì-têu pún-lòi he su̍k Ngì-ke, Ngì tsiông kì-têu su pûn Ngài; kì-têu ya-yû tsûn-sú Ngì-ke tho.
約 17:7 Liá-ha kì-têu tî só-yû Ngì só pûn Ngài-ke yit-tshiet, tshiòn-phu he tshiùng Ngì ke-vi lòi.
約 17:8 Yîn-vi Ngì só kâu pûn Ngài-ke tho-lî, Ngài yû su pûn kì-têu, kì-têu ya-yû tsiap-su, ya-yû khok-sṳ̍t tî Ngài he tshiùng Ngì ke-vi lòi, ya-yû sin Ngì yû tshâi-khién Ngài.
約 17:9 Ngài vi-tsho̍k kì-têu khì-tó; Ngài mò vi-tsho̍k sṳ-kiên-ngìn khì-tó, thu̍k-he vi-tsho̍k Ngì yí-kîn só su pûn Ngài-ke ngìn khiù; yîn-vi kì-têu he su̍k Ngì-ke.
約 17:10 Só-yû só-yû su̍k Ngài-ke he su̍k Ngì-ke; só-yû su̍k Ngì-ke ya-he su̍k Ngài-ke; Ngài-ke yùng-kông he tsia-tsho̍k kì-têu hién-mìn tshut-lòi.
約 17:11 Ngài liá-ha oi hi Ngì ke-vi,yî-heu Ngài mò tsai liù tshai liá sṳ-kiên lé, kì-têu oi liù tshai sṳ-kiên. Sṳn-kiet ke Â-pâ â ! Ngien Ngì tshâi Ngì-ke miàng, tshiu-he Ngì só pûn Ngài-ke, pó-sú kì-têu, sṳ́ kì-têu voi ha̍p-tso yit-thí, tshiong Ngì lâu Ngài khiung-yong.
約 17:12 Ngài hàn lâu kì-têu thùng-tshai ke sṳ̀, Ngài yû yung Ngì-ke miàng, tshiu-he Ngì só su pûn Ngài-ke, pó-sú kì-têu, Ngài ya-yû pó-fu kì-têu,tshù-liáu khì-tsûng yit-ke ngìn tsu-thin oi me̍t-mòng yî-ngoi, mò yit-ke lai-é voi sṳt-thet, sṳ́-tó sṳn-kîn ke fa tet yin-ngiam.
約 17:13 Tsúng-he liá-ha Ngài lòi tshiu-khiun Ngì; Ngài hàn-tshai liá sṳ-kiên sṳ̀ yû kóng liá-têu fa,he-oi pûn kì-têu ke sîm tshûng-mân Ngài-ke hí-lo̍k.
約 17:14 Ngài tsiông Ngì-ke tho su pûn kì-têu, sṳ-kiên-ngìn tshiu yen-hen kì-têu, yîn-vi kì-têu m̀-he su̍k liá sṳ-kiên, tshiong Ngài m̀-he su̍k liá sṳ-kiên án-ngiòng.
約 17:15 Ngài m̀-he khiù Ngì tai kì-têu tshut sṳ-kiên, thu̍k-he khiù Ngì pó-sú kì-têu thot-lì ok-mô ke sú.
約 17:16 Kì-têu m̀-he su̍k liá sṳ-kiên, tshiong Ngài m̀-he su̍k liá sṳ-kiên án-ngiòng.
約 17:17 Ngien Ngì yung tsṳ̂n-lî su kì-têu, tsiông tshṳ-kâ fung-hien pûn Ngì ; Ngì-ke tho tshiu-he tsṳ̂n-lî.
約 17:18 Tshiong Ngì tshâi-khién Ngài ngi̍p sṳ-kiên, Ngài ya tshâi-khién kì-têu ngi̍p sṳ-kiên.
約 17:19 Vi-tsho̍k kì-têu ke yèn-ku, Ngài tsiông tshṳ-kâ fung-hien pûn Ngì, sṳ́-tó kì-têu tshṳ-kâ ya-voi sṳ̀n-sîm fung-hien pûn Ngì.
約 17:20 Ngài m̀ tân-tshiang vi-tsho̍k liá-têu ngìn lòi khiù, Ngài ya-he vi-tsho̍k só-yû yû tsiap-su kì-têu ke tho lòi sin-kho Ngài-ke ngìn lòi khiù.
約 17:21 Ngien kì-têu tshiòn-phu ha̍p-tso yit-thí; tshiong Â-pâ, Ngì tshai Ngài tî-poi, Ngài ya tshai Ngì tî-poi, sṳ́-tó kì-têu ya tshai Ngài-têu tî-poi; ngien kì-têu tshiòn-phu ha̍p-tso yit-thí ,tshṳ̍t-to sṳ-kiên-ngìn voi sin Ngì yû tshâi-khién Ngài lòi.
約 17:22 Yû Ngì só su pûn Ngài-ke yùng-kông, Ngài ya su pûn kì-têu, sṳ́-tó kì-têu voi ha̍p-tso yit-thí, tshiong ngài-têu voi ha̍p-tso yit-thí án-ngiòng.
約 17:23 Ngài tshai kì-têu tî-poi, Ngì ya tshai Ngài tî-poi, sṳ́-tó kì-têu vàn-tshiòn ha̍p-tso yit-thí; tshṳ̍t-to sṳ-kiên-ngìn tî Ngì yû tshâi-khién Ngài, ya-yû oi-siak kì-têu, tshiong Ngì yû oi-siak Ngài án-ngiòng.
約 17:24 Â-pâ â ! Ngì só su pûn ngài-ke ngìn, Ngài só tshai ke thi-fông, liá-têu ngìn ya-voi lâu Ngài thùng-tshai, sṳ́-tó kì-têu khon-tet-tó Ngài-ke yùng-kông, tshiu-he Ngì só su pûn ngài-ke; yîn-vi Ngì tshṳ tshóng-tsho sṳ-kie tsṳ̂-tshièn tshiu oi-siak Ngài.
約 17:25 Kûng-ngi ke Â-pâ â ! Sṳ-kiên-ngìn m̀-sṳt Ngì, thu̍k-thu̍k Ngài sṳt Ngì, liá-têu ngìn ya m̀ tî Ngì tshiu-he tshâi-khién Ngài lòi ke;
約 17:26 Ngài yí-kîn sṳ́ kì-têu ngin-sṳt Ngì, Ngài ya hàn-oi sṳ́ kì-têu sṳt Ngì, sṳ́ Ngì tui Ngài-ke oi-siak tshûng-mân tshai kì-têu sâng-miang, Ngài ya tshai kì-têu sâng-miang-tsûng.