《客語白話字聖經試讀版》

 | | | 轉寄

Yok-hon Fuk-yîm, Thi-14-tsông_2 Yin-hí Sṳn-Lìn ke Pông-tshu

作者 Hak-ngî Sṳn-kîn 2009.06.07

約 14:15 Ngì-têu ká-sṳ́ oi Ngài, tshiu pit-yèn tsûn-sú Ngài-ke min-lin.
約 14:16 Ngài oi khiù Â-pâ, Kì tshiu-oi nang-ngoi su ngì-têu yit-vi Pông-tshu-tsá, sṳ́-tó Kì hó lâu ngì-têu thùng-tshai tshṳ̍t-to yún-kiú, tshiu-he tsṳ̂n-lî ke Sṳn-Lìn.
約 14:17 Sṳ-kiên-ngìn put-nèn tsiap-na̍p Kì; yîn-vi mò khon-tó Kì, ya m̀-sṳt Kì; ngì-têu sṳt Kì; yîn-vi Kì lâu ngì-têu thùng-tshai, ya-oi tshai ngì-têu sâng-miang-tsûng.
約 14:18 Ngài yit-thin m̀-voi piong-thet ngì-têu tso kû-yì; Ngài voi to-tsón-lòi ngì-têu liá-vi.
約 14:19 Kâ mò kí-kiú, sṳ-kiên-ngìn tshiu khon Ngài m̀ tó; thu̍k-he ngì-têu khon-tó Ngài, yîn-vi Ngài ki-siu̍k sâng-tén, ngì-têu ya-voi sâng-tén.
約 14:20 Tshai ke-ngit lòi-to, ngì-têu tshiu tî Ngài he tshai Ngâ Â-pâ tî-poi, ngì-têu ya tshai Ngài tî-poi, Ngài ya tshai ngì-têu ke sâng-miang-tsûng yit-yong.
約 14:21 Fàm tsiap-su Ngâ min-lin yu tsûn-sú ke ngìn, liá-ke ngìn tshiu-he oi Ngài, tsúng-he ngìn oi-siak Ngài, kì ya yit-thin pûn Ngâ Â-pâ só oi-siak, Ngài ya pit oi-siak kì, yu oi tsiông tshṳ-kâ tui kì hién-hien.
約 14:22 Yù-thai ( m̀-he Kâ-lio̍k-ngìn Yù-thai ) tshiu lâu Yâ-sû kóng: “Tsú â ! Ngióng-pân tsṳ́-yû tui ngài-têu hién-hien, m̀ tui sṳ-kiên-ngìn hién-hien nè?”
約 14:23 Yâ-sû en kì kóng: “Na oi-siak Ngài-ke ngìn, kì tshiu pit tsûn-sú Ngài-ke tho; Ngâ Â-pâ ya pit oi-siak kì, Ngài-têu pit-oi lòi tshiu-khiun kì, lâu kì khiung-ha he̍t.”
約 14:24 M̀ oi-siak Ngài-ke ngìn, kì tshiu m̀ tsûn-sú Ngài-ke fa; tsúng-he ngì-têu só thèn ke tho m̀-he Ngài-ke yi-sṳ, he tshâi-khién Ngâ Â-pâ ke tho.
約 14:25 Ngài lâu ngì-têu thùng-tshai sṳ̀, tshiu-yû hiong ngì-têu kóng liá-têu fa.
約 14:26 Tsúng-he ke Pông-tshu-tsá tshiu-he Sṳn-Lìn, he Â-pâ yîn-vi Ngài-ke miàng só oi tshâi-lòi ke Sṳn-Lìn, Kì pit tsiông só-yû ke sṳ lòi kau-thô ngì-têu, sṳ́ ngì-têu ki-tet só-yû Ngài hiong ngì-têu kóng-ko ke fa.
約 14:27 Ngài tsiông phìn-ôn liù pûn ngì-têu, Ngài tsiông Ngài-ke phìn-ôn su pûn ngì-têu, Ngài pûn ngì-têu ke, m̀-he tshiong sṳ-kie só pûn ngì-têu ke án-ngiòng, ngì-têu m̀-sṳ́ sèu, ya m̀-sṳ́ kiâng.
約 14:28 Ngì-têu thâng Ngài kóng ko: “Ngài hi, hàn-oi to-tsón-lòi tshiu-khiun ngì-têu. Ngì-têu ká-sṳ́ yû oi-siak Ngài, tshiu pit fôn-hí Ngài tsón-hi Ngâ Â-pâ ke-vi; yîn-vi Â-pâ pí Ngài kha thai.”
約 14:29 Ngài tshai liá-ke sṳ màng fat-sên yî-tshièn, siên lâu ngì-têu kóng, sṳ́-tó sṳ fat-sên ke sṳ̀ ngì-têu tshiu-voi sin.
約 14:30 Ngài liá-ha m̀ lâu ngì-têu kâ-kóng, yîn-vi liá sṳ-kie ke thúng-tshṳ-tsá voi lòi lé; kì tui Ngài lòi kóng ya mò son-mak-ke.
約 14:31 Thu̍k-thu̍k he sṳ́-tó sṳ-kiên-ngìn voi tî Ngài oi-siak Â-pâ, ya tseu Â-pâ só min-lin Ngài mak-ke, Ngài tshiu án-ngiòng hàng. Hong-hí-lòi, ên-têu lòi hi.