《客語白話字聖經試讀版》

 | | | 轉寄

Yok-hon Fuk-yîm, Thi-13-tsông_1 Yâ-sû Sé Ho̍k-sâng ke Kiok

作者 Hak-ngî Sṳn-kîn 2009.05.03

約 13:1 Yì-ye̍t-tsiet tshièn, Yâ-sû tî Kì lì-khôi liá-ke sṳ-kie tsón-hi Â-pâ ke sṳ̀-heu to lé , pún-lòi Kì tshiu oi-siak tshai sṳ-kie su̍k Kì tshṳ-kâ ke ngìn, tshiu oi-siak kì-têu to tái.
約 13:2 Tshai sṳ̍t-ya ke-sṳ̀, mò-kuí yí-kîn khùng-tsṳ Kâ-lio̍k-ngìn Sî-mùn ke lai-é Yù-thai ke sîm,sṳ́ kì kiet-sîm tshut-mai Yâ-sû.
約 13:3 Yâ-sû tî Â-pâ yû tsiông yit-tshiet ke khièn-piang kâu tshai Kì-ke sú, tî tshṳ-kâ he tshiùng Song-tsú ke-vi tshut-lòi, ya-oi tó-tsón Song-tsú ke-vi hi.
約 13:4 Kì tshiu hong-hí-lòi, lì-khôi tsho-vi, thot-hâ ngoi-sâm; tshṳ-kâ nâ sú-pha vì tshai yêu-khiên.
約 13:5 Yu tó-suí tshai kiok-phùn, khôi-sṳ́ sé mùn-thù ke kiok, yu yung ke sú-pha lòi tshu̍t-tsâu.
約 13:6 Kì lòi-to Sî-mùn Pí-tet ke mien-tshièn, Pí-tet tui Kì kóng: “Tsú â ! Ngì oi sé ngài-ke kiok mâ?”
約 13:7 Yâ-sû en kì kóng: “Ngài só tso ke sṳ ngì liá-ha m̀ tî, m̀-ku tsiông-lòi ngì tshiu liáu-kié.”
約 13:8 Pí-tet tui Kì kóng: “Ngài tshie̍t-tui mò oi pûn Ngì sé ngài-ke kiok,” Yâ-sû en kì kóng: “Na Ngài mò sé ngì-ke kiok , ngì tshiu lâu Ngài mò kuân-he.”
約 13:9 Sî-mùn Pí-tet tui Kì kóng: “Tsú â ! M̀ tân-tshiang sé ngài-ke kiok, sú lâu thèu-nà ya-oi sé.”
約 13:10 Yâ-sû tui kì kóng: “Sṳ̂n sé-hó ke ngìn tshiòn-sṳ̂n tshiu tshiang-li, sé- kiok tshiu la; ngì-têu he tshiang-li, thu̍k-he mò tshiòn-phu tshiang-li án-ngiòng.”
約 13:11 Yîn-vi Yâ-sû tî tshut-mai Kì-ke he má-ngìn;só-yî tshiu kóng: “Ngì-têu mò tshiòn-phu tshiang-li.”
約 13:12 Yâ-sû sé hó kì-têu ke kiok, tsiông sâm tsok-hí-lòi , yu tshô tó-tsón-hi, tshiu tui kì-têu kóng: “Ngài lâu ngì-têu só tso ke sṳ ngì-têu mìn-pha̍k mâ?”
約 13:13 Ngì-têu ham Ngài tso Sîn-sâng lâu tso Tsú; ngì-têu án-ngiòng kóng he tsho̍k, yîn-vi Ngài pún-lòi tshiu-he.
約 13:14 Ngài he ngì-têu ke Tsú, ngì-têu ke Sîn-sâng, yu hàn sé ngì-têu ke kiok, ngì-têu ya yin-tông pí-tshṳ́ fu-siông sé-kiok.
約 13:15 Ngài tso póng-yong pûn ngì-têu, sṳ́-tó ngì-têu tseu Ngài só tso ke hi hàng, ngì-têu ya tseu án-ngiòng lòi hàng.
約 13:16 Ngài sṳ̍t-tshai lâu ngì-têu kóng, nù-phu̍k mò pí kiâ tsú ko thai, fung tshâi-phai ke ngìn ya mò pí phai Kì-ke ngìn ko thai.
約 13:17 Ngì-têu yí-kîn tî liá-têu sṳ, na lòi hàng tshiu-yû fuk.
約 13:18 Ngài liá-ke fa m̀-he tsṳ́ ngì-têu tsung-ngìn; Ngài ngin-sṳt Ngài só sién ke ngìn. Tsúng-he sṳn-kîn só kóng: “Thùng Ngài khiung-ha sṳ̍t-fan ke ngìn poi-phan Ngài, liá-ki fa pit-thin voi sṳ̍t-hien.”
約 13:19 Ngài tshai sṳ-tshìn màng fat-sên yî-tshièn siên lâu ngì-têu kóng, he-oi pûn ngì-têu tshai sṳ-tshìn fat-sên ke sṳ̀, ngì-têu tshiu sin Ngài tshiu-he “Tshṳ-yû Yún-yû” ke.
約 13:20 Ngài sṳ̍t-tshai lâu ngì-têu kóng, tsiap-na̍p Ngài só tshâi-khién ke ngìn tshiu-he tsiap-na̍p Ngài; tsiap-na̍p Ngài-ke, ya tshiu-he tsiap-na̍p tshâi-khién Ngài-ke.