《客語白話字聖經試讀版》

 | | | 轉寄

Yok-hon Fuk-yîm, Thi-8-tsông_4 Tshṳ-yù-ngìn lâu Nù-phu̍k

作者 Hak-ngî Sṳn-kîn 2008.12.21

約 8:31 Yâ-sû tui ke-têu sin Kì-ke Yù-thai-ngìn kóng: “Ngì-têu na sòng-sòng tsûn-sú Ngài-ke tho, ngì-têu tshiu tsṳn-kîn he Ngài-ke mùn-thù;
約 8:32 Ngì-têu voi sṳt tsṳ̂n-lî, tsṳ̂n-lî ya-voi sṳ́ ngì-têu tet tshṳ-yù.”
約 8:33 Kì-têu tshiu en Kì kóng: “Ngài-têu he Â-pak-lâ-hón ke tsṳ́-sûn, tshiùng-lòi m̀-sṳt tso ngìn ke nù-phu̍k, Ngì ngióng-voi kóng: ‘Sṳ́ ngì-têu tet tshṳ-yù nò?’”
約 8:34 Yâ-sû en kì-têu kóng, “Ngài sṳ̍t-tshai lâu ngì-têu kóng,só-yû fam-tshui ke ngìn tshiu-he tshui ke nù-phu̍k.
約 8:35 Nù-phu̍k tshai kâ-thìn-tsûng mò yit-thin tshiong lai-é yún-kiú su̍k-yî kâ-thìn.
約 8:36 Ká-sṳ́ he Song-tsú ke Lai-é sṳ́ ngì-têu tet tshṳ-yù, ngì-têu tshiu-he tshṳ-yù ke ngìn.
約 8:37 Ngài tî ngì-têu he Â-pak-lâ-hón ke tsṳ́-sûn, tsúng-he ngì-têu hàn sióng-oi tshṳ̀ Ngài, yîn-vi Ngài-ke tho ngì-têu m̀ tsiap-su.
約 8:38 Ngài só kóng ke he Ngâ Pâ tsṳ́-sṳ Ngài-ke, ngì-têu só tso ke he ngì-têu ke tsú-siên lâu ngì-têu kóng ke.”
約 8:39 Kì-têu tshiu en Kì kóng: “Ngài-têu ke tsú-siên he Â-pak-lâ-hón.” Yâ-sû tui kì-têu kóng: “Ká-sṳ́ ngì-têu he Â-pak-lâ-hón ke tsṳ́-sûn, hàng-sṳ tshiu pit-thin lâu Â-pak-lâ-hón khiung-yong.
約 8:40 Ngài hiong ngì-têu kóng ke tsṳ̂n-lî, he Ngài tshiùng Song-tsú ke-vi thâng-tó ke, ngì-têu liá-ha sióng-oi tshṳ̀ Ngài,liá-ke m̀-he Â-pak-lâ-hón só tso ke sṳ â !
約 8:41 Ngì-têu he tso ngì-têu ke fu só tso ke sṳ.” Kì-têu tshiu tui Kì kóng: “Ngài-têu m̀-he sṳ̂-sên-tsṳ́, ngài-têu vì-yit ke Â-pâ, tshiu-he Song-tsú.”
約 8:42 Yâ-sû tui kì-têu kóng: “Na Song-tsú he ngì-têu ke Â-pâ, ngì-têu tshiu yit-thin voi oi Ngài; yîn-vi Ngài he tshiùng Song-tsú ke-vi lòi ke; Ngài m̀-he tshṳ-kâ lòi ke, he Kì tshâi-khién Ngài lòi ke.
約 8:43 Ngì-têu ngióng m̀-voi mìn-pha̍k Ngài-ke fa? Yîn-vi ngì-têu thâng Ngài-ke tho m̀ ngi̍p-ngí.
約 8:44 Ngì-têu he mò-kuí ke tsṳ́-ńg, phiên-phiên oi tseu ngì-têu ke sṳ̂-yu̍k hàng-sṳ. Kì tshṳ kú-tsó tshiu-he mèu-hoi ngìn ke, ya mò khî tshai tsṳ̂n-lî liá-phién, yîn-vi kì kîn-pún mò tsṳ̂n-lî. Kì tshiu-he fâ-liâu-kú,ya-he yit-tshiet hî-ká ke ngièn-thèu.
約 8:45 Tsúng-he yîn-vi Ngài kóng tsṳ̂n-lî, ngì-têu tshiu m̀ sin Ngài.
約 8:46 Ngì-têu tsûng má-ngìn nèn tsṳ́-tsṳn Ngài yû tshui nò? Na Ngài kóng ke he tsṳ̂n-lî, ngì-têu tso-mak-ke m̀ sin Ngài nò?
約 8:47 Só-yû su̍k Song-tsú ke tsṳ́-ńg, tshiu thâng Song-tsú ke fa, ngì-têu he yîn-vi liá-ke yèn-ku mò thâng, ngì-têu m̀-he su̍k Song-tsú.”