《客語白話字聖經試讀版》

 | | | 轉寄

Mâ-khó Fuk-yîm thi 6 tsông_04 Pûn Ńg-tshiên Ngìn Sṳ̍t-páu

作者 Hak-ngî Sṳn-kîn 2014.03.09

6:30 Sṳ́-thù to-tsón-lòi tshîn-tshiu Yâ-sû, tshiu tsiông kì-têu yit-tshiet só hàng ke, tshiòn-phu po pûn Kì tî.

6:31 Yâ-sû lâu kì-têu kóng : “Ngì-têu thèn Ngài lòi hi phiên-phit ke thi-fông hiû-sit yit-ha.” Yîn-vi lòi-lòi hi-hi ke ngìn tshin tô, Yâ-sû lâu mùn-thù mò-hàn to mò sṳ̀-kiên hó sṳ̍t-fan.

6:32 Kì-têu tshiu tshô-sòn tshut-fat, tiâm-tiâm hi phiên-phit ke thi-fông.

6:33 Tsung-ngìn khon-tó Kì-têu lì-khôi, ngiàm-sṳ̀ ngin-tó Kì-têu, tshiu tshiùng kok-sàng tshut-lòi, siông-tsâng kón-hi, pí Yâ-sû lâu mùn-thù siên to ke thi-fông.

6:34 Yâ-sû khon-tó yit thai-khiùn ngìn, tshiu lìn-mén kì-têu, yîn-vi kì-têu tshiong mò ngìn khon-ku ke yòng-khiùn; tshiu lòi kóng tshin-tô tho-lî pûn kì-têu thâng.

6:35 Lìm-am-é ke sṳ̀, Kiâ mùn-thù lòi kien Kì, kóng : “Liá-ke só-tshai he khóng-yâ;

6:36 tshiáng ham tsung-ngìn lì-khôi, sṳ́ kì-têu hi fu-khiun thi-fông mâi têu tûng-sî lòi sṳ̍t.”

6:37 Tsúng-he Kì en kì-têu kóng : “Ngì-têu sung tûng-sî pûn kì-têu sṳ̍t.” Mùn-thù tshiu lâu Kì kóng : “Ngì oi ngài-têu yung lióng-pak-tsak ngiùn-tshièn hi mâi piáng-è lòi pûn kì-têu sṳ̍t mâ?”

6:38 Yâ-sû mun kì-têu kóng : “Ngì-têu hi tshìm-khon-é, lûng-tsúng yû kí-tô piáng-è?” Mùn-thù khon-liáu, tshiu to-tsón lòi kóng : “Ńg-tsak piáng, lâu lióng-mî ǹg.”

6:39 Yâ-sû fûn-fu Kiâ mùn-thù hêm tsung-ngìn fûn-khôi tshô tshai tshó-phiàng-táng.

6:40 Tsung-ngìn tshiu tshô-hâ-lòi, yû-têu yit-phài yit-pak-sà, yû-têu ńg-sṳ̍p-sà.

6:41 Yâ-sû nâ-hí ke ńg-tsak piáng lâu lióng-mî ǹg, ngo-thèu mong-thiên, kám-tshia Song-tsú, yèn-heu yu pak-khôi ke-têu piáng, kâu pûn mùn-thù, mùn-thù tshiu tsai pûn pûn tsung-ngìn; tshiong án-ngiòng, Kì ya tsiông ke lióng-mî ǹg-è pûn pûn tsung-ngìn.

6:42 Tsung-ngìn tshiòn-phu sṳ̍t-to páu.

6:43 Mùn-thù tsiông só tshûn ke piáng-sui-é lâu ǹg-suí-é ngiâm-hí-lòi, tsông-mân sṳ̍p-ngi-tsak làm-è.

6:44 Sṳ̍t ke-têu piáng-è ke ngìn yû ńg-tshiên-sà.