《客語白話字聖經試讀版》

 | | | 轉寄

Mâ-khó Fuk-yîm thi 6 tsông_03 Sṳ̂-sé Yok-hon Ko-sṳ̂n

作者 Hak-ngî Sṳn-kîn 2014.03.02

6:14 Hî-li̍t-vòng tshiu thâng-tó kuân-he Yâ-sû yit-tshiet ke sṳ,yîn-vi Yâ-sû ke miàng-sâng tshòn-to tak só-tshai; tshiu yû ngìn kóng : “Hàng sé-lî ke Yok-hon fán-sâng, ku-só tshâi-khién kì lòi hàng liá-têu sṳ̀n-tsiak.”

6:15 Yû phe̍t-ngìn kóng : “Kì he Yî-li-â”, ya yû phe̍t-ngìn kóng : “He siên-tî, tshiong kú-sṳ̀-thoi ke siên-tî.”

6:16 Hî-li̍t thâng-tó tshiu kóng : “ Pûn ngài tsám-thèu ke Yok-hon fán-sâng lé !”

6:17 Yîn-vi Hî-li̍t sṳt ham ngìn hi tsok Yok-hon, tsiông kì thak-tén, kuân tshai kâm-ngiu̍k-tú, he vi-tsho̍k Hî-lò-tí; yîn-vi Hî-lò-tí he Hî-li̍t ke hiûng-thi Fî-li̍t ke pû-ngiòng, tsúng-he pûn kì tsam-lòi tso pû-ngiòng.

6:18 Yok-hon sṳt lâu Hî-li̍t kóng : “Ngì tsam hiûng-thi ke pû-ngiòng he m̀ ha̍p-fap ke.”

6:19 Kú-só, Hî-lò-tí tshiu yen-hen Yok-hon, sióng-oi sat kì; tsúng-he mò kî-fi;

6:20 yîn-vi Hî-li̍t tî Yok-hon he tsṳn-tshṳ̍t sṳn-kiet ke ngìn, tshiu kin-tshung pó-fu kì. Hî-li̍t tak-pái thâng-tó Yok-hon kóng ke fa, tshiu tseu hàng; tsúng-he yu fôn-hí thâng kì kóng-lun.

6:21 Hî-lò-tí só tén ke kî-fi to lé. Hî-li̍t tshai kì sâng-ngit set-si̍t, tshiáng ke-têu vùn-vú pak-kôn lâu Kâ-li-li mìn-kiên ke liâng-siu;

6:22 Yèn-si̍t-tsûng, Hî-lò-tí ke moi-é ngi̍p-lòi thiau-vú, Hî-li̍t lâu ngìn-hak tshin fôn-hí; Hî-li̍t-vòng tshiu lâu se-â-moi-é kóng : “Thai-fam ngì só oi ke, ngài tshiu voi sóng pûn ngì.”

6:23 Hî-li̍t yu fat-sṳ kóng : “Thai-fam ngì só khiù ngài-ke, tshiu-he ngài-ke yit-pan kông-sân, ngài ya voi pûn ngì.”

6:24 Se-â-moi-é tshut-hi mun kiâ â-mê, kóng : “Ngài oi khiù mak-ke?” Kì â-mê en kóng : “Sṳ̂-sé Yok-hon ke thèu-nà.”

6:25 Se-â-moi-é ngi̍p-lòi kien vòng, khiù kóng : “Ngài oi ngì tsit-sṳ̀ tsiông sṳ̂-sé Yok-hon ke thèu-nà piong tshai phàn-tú lòi pûn ngài.”

6:26 Vòng thâng-tó liá-ke tshiáng-khiù tshiu sṳ̍p-fûn vì-nàn; tsúng-he yí-kîn tshai ngìn-hak mien-tshièn fat-sṳ lè, tshiu mò-fap-thu khî-tshie̍t liá se-â-moi-é ke tshiáng-khiù.

6:27 Vòng tsit-sṳ̀ phai yit-ke vi-pîn hi nâ Yok-hon ke thèu-nà lòi. Vi-pîn tshiu hi kâm-ngiu̍k, tsám kì-ke thèu-nà;

6:28 thèu-nà tshiu piong tshai phàn-tú, nâ lòi pûn se-â-moi-é khon; kì tshiu kâu pûn kiâ mê.

6:29 Yok-hon ke mùn-thù thâng-tó, tshiu lòi tsiông Yok-hon ke sṳ̂n-sṳ̂ liâng-tséu, tsong tshai fùn-mu tî-poi.