《客語白話字聖經試讀版》

 | | | 轉寄

Yok-hon Fuk-yîm, Thi-7-tsông_2 Yâ-sû Ko Tshu-phâng-tsiet

作者 Hak-ngî Sṳn-kîn 2008.10.12

約 7:10 M̀-ku Yâ-sû ke ló-thâi hi ko-tsiet yî-heu, Yâ-sû ya thèn-tén hi, m̀-he kûng-khôi hi, he am-tsûng hi ke.
約 7:11 Yù-thai-ngìn ke liâng-siu tshiu-tshai tsiet-khì-tsûng si-tshu tshìm Kì, kín-mun: “Kì tshai nai-vi?”
約 7:12 Tshai tsung-ngìn tsṳ̂-tsûng, vi-tsho̍k Yâ-sû ngi-lun fûn-fûn;yû ngìn kóng: “Kì he hó-ngìn”; yû-têu kóng: “M̀-he án-ngiòng, Kì tshai mì-fe̍t tsung-ngìn.”
約 7:13 Tsúng-he mò ngìn kám kûng-khôi thàm-lun Kì, yîn-vi kì-têu kiâng Yù-thai-ngìn ke liâng-siu.
約 7:14 To tsiet-khì ke yit-pan, Yâ-sû tshiu sông-hi Sṳn-thien kau-hiun ngìn.
約 7:15 Só-yî Yù-thai-ngìn ke liâng-siu hí-ngì, kóng: “Liá-ke ngìn mò su mak-ke kau-yuk, ngióng-voi án yû ho̍k-mun nò?”
約 7:16 Yâ-sû en kì-têu kóng: “Ngài-ke kau-sṳ m̀-he Ngài-ke, he tshâi-khién Ngài lòi ke Song-tsú ke.”
約 7:17 Ngìn he-oi hàng Song-tsú tsṳ́-yi, tshiu pit-thin tî Ngài-ke kau-sṳ he tui Song-tsú lòi ke, ya-he Ngài tseu tshṳ-kâ ke yi-sṳ lòi kóng.
約 7:18 Ngìn tseu tshṳ-kâ ke yi-sṳ lòi kóng, tshiu-he khiù yùng-kông tshṳ-kâ; tsúng-he yùng-kông tshâi-khién Kì lòi ke, liá-ke tshiu-he tsṳ̂n-sṳ̍t mò hî-ká ke ngìn.
約 7:19 Mô-sî m̀-he tsiông li̍t-fap kâu pûn ngì-têu, ngì-têu tsṳ̂-tsûng ya mò yit-sà tsûn-sú li̍t-fap mé? Ngì-têu tso-mak-ke sióng-oi tshṳ̀ Ngài nò?”
約 7:20 Tsung-ngìn en kóng: “Ngì pûn kuí fu-sṳ̂n, má-ngìn sióng-oi tshṳ̀ Ngì?”
約 7:21 Yâ-sû en kì-têu kóng: “Ngài tshai Ôn-sit-ngit yû hàng yit-ke sṳ̀n-tsiak, ngì-têu tshiu tshiòn-phu khon-tso khì-yi.”
約 7:22 Mô-sî fûn-fu ngì-têu hàng kot-lî ( khì-sṳ̍t kot-lî m̀-he tui Mô-sî lòi, he tui tsú-siên khôi-sṳ́); ngì-têu tshiu-tshai Ôn-sit-ngit vi ngìn hàng kot-lî.
約 7:23 Na-he ngìn tshai Ôn-sit-ngit hàng kot-lî, muk-tit he vì-fu Mô-sî ke li̍t-fap; án-ngiòng Ngài tshai Ôn-sit-ngit sṳ́-tó yit-ke ngìn tshiòn-yi, ngì-têu ngióng-pân tshiu nâu Ngài nè?
約 7:24 Ngì-têu m̀-hó tseu ngoi-péu lòi phan-ton, oi yung kûng-tong ke phêu-tsún lòi phan-ton.