《客語白話字聖經試讀版》

 | | | 轉寄

Má-thai Fuk-yîm thi 23 tsông_02 Tsit-phi Ká-hó ke Ngìn

作者 Hak-ngî Sṳn-kîn 2012.11.11

23:13 “Ngì-têu Fap-li-soi-ngìn lâu liá-pân ká-hó ke Kîn-ho̍k kau-sṳ̂ tshám lé ! Yîn-vi ngì-têu tshai ngìn ke mien-tshièn tsiông Thiên-kuet ke mùn kuân-hí-lòi, yîn-vi ngì-têu tshṳ-kâ m̀ ngi̍p-hi, ya m̀ oi pûn ke-têu sióng-oi ngi̍p ke ngìn ngi̍p-hi.
23:14 “Ngì-têu liá-pân ká-hó ke Kîn-ho̍k kau-sṳ̂ lâu Fap-li-soi-ngìn tshám lé ! Ngì-têu khuî-khiam kuá-fu, thûn kì-têu ke sán-ngia̍p.Yèn-heu tshai ngìn ke mien-tshièn péu-yên tshòng-phiên ke khì-tó. Só-yî ngì-têu yit-thin voi su-tó tshin ngiàm ke tsit-fa̍t.”
23:15 “Ngì-têu Fap-li-soi-ngìn lâu liá-pân ká-hó ke Kîn-ho̍k kau-sṳ̂ tshám lé ! Yîn-vi ngì-têu hàng-phien thiên-ngài hói-kok, oi sṳ́-tó mî-yit-ke-ngìn lòi ngi̍p-kau, tén-to kì-têu ngi̍p-kau yî-heu, ngì-têu sa sṳ́ kì-têu pien-tso pí ngì-têu kâ-phi fái, pí ngì-têu kien-kâ tông su thi-ngiu̍k ke hìn-fa̍t.
23:16 “Ngì liá-têu tshiâng-miâng ke tai-lu ke ngìn tshám lé ! Ngì-têu kóng : ‘Ngìn ká-sṳ́ tsṳ́-tén Sṳn-thien lòi fat-sṳ, tshiu mò mak-ke siông-kôn; ká-sṳ́ yû ngìn tsṳ́-tén Sṳn-thien-tú ke kîm-é lòi fat-sṳ, kì tshiu thin-tsho̍k oi tsûn-sú.’
23:17 Ngì liá-têu tshiâng-miâng ke ngong-é â ! Tsia-mun, he kîm-é kha tshung-yeu, fe̍t-tsá he sṳ́ kîm-é sàng-tso sṳn-vu̍t ke Sṳn-thien kha tshung-yeu nò?
23:18 Ngì-têu yu kóng : ‘Ngìn ká-sṳ́ he tsṳ́-tén tsi-thàn lòi fat-sṳ tshiu mò siông-kôn; ká-sṳ́ yû ngìn tsṳ́-tén tsi-thàn-táng ke tsi-vu̍t fat-sṳ, kì tshiu thin-tsho̍k oi tsûn-sú.’
23:19 Ngì liá-têu tshiâng-miâng-é â ! He tsi-vu̍t kha tshung-yeu, fe̍t-tsá he sṳ́ tsi-vu̍t sàng-tso sṳn ke tsi-thàn kha tshung-yeu nò?
23:20 Tsúng-he, tsṳ́-tén tsi-thàn lòi fat-sṳ ke ngìn, tshiu-he tsṳ́-tén tsi-thàn lâu yit-tshiet tshai tsi-thàn-táng ke tsi-vu̍t lòi fat-sṳ;
23:21 tsṳ́-tén Sṳn-thien lòi fat-sṳ ke ngìn, tshiu-he tsṳ́-tén Sṳn-thien lâu he̍t tshai tî-poi ke Song-tsú lòi fat-sṳ;
23:22 tsṳ́-tén thiên lòi fat-sṳ ke ngìn, tshiu-he tsṳ́-tén Song-tsú ke pó-tsho lâu tshô tshai táng-kô ke Song-tsú lòi fat-sṳ.
23:23 “Ngì-têu Fap-li-soi-ngìn lâu liá-pân ká-hó ke Kîn-ho̍k kau-sṳ̂ tshám lé ! Yîn-vi ngì-têu tsiông pho̍k-hò, fì-hiông, pat-kok liá-têu hiông-liau ya hien sṳ̍p-fûn tsṳ̂-yit pûn Song-tsú; tsúng-he li̍t-fap-tsûng kha tshung-yeu ke, tsit-he kûng-ngi, lìn-mén, lâu sin-sṳ̍t, ngì-têu tshiu piong-thet kì. Khì-sṳ̍t liá-têu tshiu yin-tông oi tshin-li̍t hi hàng ke; khì-thâ ke, ya tso-m̀-tet fut-lio̍k.
23:24 Ngì liá-têu tshiâng-miâng tai-lu ke-ngìn â! Ngì-têu tui yím-liau-tsûng tsiông máng-é li-tshut-lòi, tsúng-he, lo̍k-thò ngì-têu tshiu thûn-lo̍k hi.
23:25 “Ngì-têu Fap-li-soi-ngìn lâu liá-pân ká-hó ke Kîn-ho̍k kau-sṳ̂ tshám lé! Yîn-vi ngì-têu tsiông pî-é lâu phàn-è ke ngoi-poi sé-to án tshiang-li, m̀-ku ke nui-tú tshiu tsông-mân thâm-sîm lâu fong-thong.
23:26 Tshiâng-miâng ke Fap-li-soi-ngìn â, ngì siên tsiông pî-é ke tî-poi sé tshiang-li, án-ngiòng kì-ke ngoi-poi ya-voi tshiang-li.
23:27 “Ngì-têu Fap-li-soi-ngìn lâu liá-pân ká-hó ke Kîn-ho̍k kau-sṳ̂ tshám lé! Yîn-vi ngì-têu he tshiong fún-pha̍k ke fùn-mu, ngoi-poi khon-hí-lòi tshin tsiâng, tsúng-he ke tî-poi tshiu-he tshûng-mân sí-ngìn kut-thèu lâu kok-yong ô-tsô tûng-sî.
23:28 Ngì-têu ya-he án-ngiòng, péu-mien pûn ngìn khon-hí-lòi sṳ̍p-fûn kûng-tsṳn, tsúng-he nui-sîm tshiu tshûng-mân hî-ká lâu sià-ok.