《客語白話字聖經試讀版》

 | | | 轉寄

Má-thai Fuk-yîm thi 23 tsông_01 Tsit-phi Kîn-ho̍k Kau-sṳ̂ lâu Fap-li-soi-ngìn

作者 Hak-ngî Sṳn-kîn 2012.11.04

23:1 Ke-sṳ̀, Yâ-sû tui tsung-ngìn lâu Kì-ke mùn-thù kóng,
23:2 “Kîn-ho̍k kau-sṳ̂ lâu Fap-li-soi-ngìn tshô tshai kié-sṳt Mô-sî li̍t-fap ke-vi.
23:3 Só-yî, só-yû kì-têu só min-lin ngì-têu ke, ngì-têu oi thâng-tshiùng pin tsûn-hàng kì-têu ke kau-hiun, m̀-ku m̀-hó tseu kì-têu só-tso ke lòi hàng; yîn-vi kì-têu voi kóng, m̀-voi hàng.
23:4 Kì-têu tsiông nàn khâi ke tshûng-tâm khún-tén, piong tshai phe̍t-ngìn ke kiên-thèu; tsúng-he kì-têu tshṳ-kâ ya m̀-hén tshûn yit-kî sú-tsṳ́ hi then-sú.
23:5 Kì-têu só tso ke sṳ, tshiòn-phu he tso pûn ngìn khon; yîn-vi kì-têu tsiông tai tshai ngiak-thèu lâu sú-hong ke kîn-vù-thoi tso kha-fat kha-thai têu, kì-têu ya tsiông sâm-tshui-é tso kha-tshòng têu;
23:6 kì-têu oi tshô yèn-si̍t-tsûng ke thai-vi lâu fi-thòng-tú ke thi̍t-phe̍t tsho-vi;
23:7 kì-têu yu hau ngìn tshai kûng-khiung tshòng-só tui kì-têu hàng lî, lâu pûn ngìn ham-tso Sîn-sâng.
23:8 Tsúng-he ngì-têu mò yin-kôi pûn ngìn tshṳ̂n-tso ‘Sîn-sâng’; yîn-vi ngì-têu ke Sîn-sâng tshiu tsṳ́-yû yit-vi, ngì-têu tshiòn-phu he hiûng-thi.
23:9 Ngì-têu m̀-hó tshṳ̂n sṳ-kiên ke ngìn tso ngì-têu ke ‘Â-pâ’; yîn-vi ngì-têu ke Â-pâ tsṳ́-yû yit-vi, tsit-he tshai thiên-táng ke-vi.
23:10 “Ngì-têu ya mò yin-kôi pûn ngìn tshṳ̂n-tso ‘Sṳ̂-fu’, yîn-vi ngì-têu ke ‘Sṳ̂-fu’ tsṳ́-yû yit-vi, tsit-he Kî-tuk.
23:11 Tshai ngì-têu tông-tsûng má-ngìn he tsui ví-thai ke, yit-thin oi tso ngì-têu ke phu̍k-ngìn.
23:12 Só-yû m̀-lun má-ngìn he tshṳ-kô, tshiu yit-thin kong tso pî-mì, ya m̀-lun má-ngìn he kâm-sîm pî-mì, tshiu yit-thin kô-sṳ̂n.