《客語白話字聖經試讀版》

 | | | 轉寄

Má-thai Fuk-yîm thi 22 tsông_01 Fûn-yîn Yèn-si̍t ke Pí-yi

作者 Hak-ngî Sṳn-kîn 2012.09.30

22:1 Yâ-sû en kì-têu kóng: “Ngài lòi yung pí-yi lâu ngì-têu kóng.”
22:2 Thiên-kuet khó pí tso yit-ke kuet-vòng, vi-tsho̍k kì-ke lai-é tsún-phi fûn-yîn ke yèn-si̍t.
22:3 Kì phai kì-ke phu̍k-ngìn hi hêm kì só tshiáng ke ngìn lòi fu yèn-si̍t, kì-têu m̀-hén lòi.
22:4 Kì yu phai phe̍t-ke phu̍k-ngìn hi kóng: ‘Tshiu lâu ngài só tshiáng ke ngìn kóng, ngài-ke tsok-si̍t yí-kîn tsún-phi hó lé. ngài-ke ngiù-kú lâu phì ke thèu-sâng ya yí-kîn tshṳ̀-hó, hó lòi fu fûn-yîn ke yèn-si̍t.’
22:5 Tsúng-he ke-têu su yêu-tshiáng ke ngìn-hak hàn-he m̀ tap kì, tshiu-hi tso kì-têu tshṳ-kâ ke sṳ-tshìn, yit-ke hi kì tshṳ-kâ ke thièn-hong, yit-ke hi tso kì-ke sên-lî.
22:6 Khì-thâ ke ngìn tshiu tsok kì ke-têu phu̍k-ngìn, vú-yu̍k kì-têu, yèn-heu sat-sí kì-têu.
22:7 Kuet-vòng tshiu fî-sòng fat-khién, tshiu phai kì-ke kûn-tui hi me̍t-thet ke-têu hiûng-sú, sêu-thet kì-têu ke sàng-sṳ.
22:8 Yèn-heu tshiu tui kì-ke phu̍k-ngìn kóng: ‘Fûn-yîn ke yèn-si̍t yí-kîn tsún-phi hó, tsúng-he siên-tshièn só tshiáng ke-ngìn mò tsṳ̂-kiet.
22:9 Só-yî, ngì-têu liá-ha hó hi thai-lu-hong, só-yû só tû-tó ke ngìn tshiu tshiòn-phu tsiông kì-têu tshiáng-lòi fu liá fûn-yîn ke yèn-si̍t.’
22:10 Ke-têu phu̍k-ngìn tshiu tshut-hi thai-lu-hong, só-yû só tû-tó ke ngìn, mò-lun ok fe̍t san-ngìn, tshiòn-phu tshiáng-lòi, sṳ́ fûn-yîn ke tsok-si̍t tshô- nêm lé.
22:11 “Kuet-vòng tshut-lòi khon-tó yit-ke ngìn-hak mò tsok lî-fu̍k,
22:12 tshiu tui kì kóng: ‘Phèn-yû â, ngì mò tsok lî-fu̍k, ngióng-pân ngi̍p liá lòi nò?’ Kì tshiu tiâm-tiâm mò kóng-fa.
22:13 Kuet-vòng tshiu tui phu̍k-ngìn kóng: ‘Tsiông kì-ke sú-kiok tshàn-tén, thiáu kì to ngoi-poi ke vû-am-tsûng; tshai-ke kì yit-thin voi thai-keu lâu ngâu-ngà tshiet-tshṳ́.’ ”
22:14 Yâ-sû kiet-lun kóng: “Yîn-vi su yêu-tshiáng ke ngìn tshin-tô, tet-tó kién-sién ke ngìn tshiu tshin-séu.”