《客語白話字聖經試讀版》

 | | | 轉寄

Má-thai Fuk-yîm thi 14 tsông_01, Sṳ̂-sé Yok-hon ke Ko-sṳ̂n

作者 Hak-ngî Sṳn-kîn 2011.11.06

14:1 Ke- sṳ̀, Kâ-li-li ke Hî-li̍t-vòng thâng-tó Yâ-sû ke miàng-sâng,
14:2 tshiu tui kì-ke thai-sṳ̀n kóng : “Liá-ke ngìn thin-tsho̍k he Sṳ̂-sé Yok-hon fán-sâng, ku-tshṳ́ Kì tsang yû hàng liá-têu sṳ̀n-tsiak ke nèn-li̍t.”
14:3 Yîn-vi Hî-li̍t vi-tsho̍k kiâ hiûng-thi Fî-li̍t ke pû-ngiòng Hî-lò-tí, sṳt ha-lin tsiông Yok-hon thak-tén kuân tshai kâm-ngiu̍k-tú.
14:4 Yîn-vi Yok-hon sṳt tui Hî-li̍t kóng : “Ngì tsam Hî-lò-tí tso pû-ngiòng he m̀ ha̍p-fap ke.”
14:5 Hî-li̍t sióng oi sat kì, tsúng-he kiâng tsung-ngìn, yîn-vi tsung-ngìn siông-sin Yok-hon he siên-tî.
14:6 Hî- li̍t tso sâng-ngit ke ngit, Hî-lò-tí ke moi-é tshai ngìn-hak mien-tshièn thiau-vú, sṳ́ Hî- li̍t fôn-hí.
14:7 Hî-li̍t tshiu tui kì fat-sṳ, yin-hí kì, put-lun kì só khiù ke tshiu sóng pûn kì.
14:8 Kì su-tó kiâ mê ke kâu-sô, tshiu yêu-khiù kóng : “Tshiáng tsiông hàng Sṳ̂-sé Yok-hon ke thèu-nà piong tshai phàn-tú pûn ngài.
14:9 Vòng tshiu kám-kok fî-sòng vì-nàn; tsúng-he kì yí-kîn tshai ngìn-hak mien-tshièn fat-sṳ lè, tsṳ́-yû ha-lin tseu kì só yêu-khiù ke pûn kì.
14:10 Só-yî, Hî-li̍t tshiu phai ngìn hi kâm-ngiu̍k-lî, tsám Yok-hon ke thèu-nà.
14:11 Tsiông kì-ke thèu-nà piong tshai phàn-tú têu pûn se-â-moi-é, kì tshiu kâu pûn kiâ mê Hî-lò-tí.
14:12 Yok-hon ke mùn-thù lòi, tsiông sṳ̂n-sṳ̂ liâng-hi mài-tsong; yèn-heu tshiu tsiông liá-khien sṳ kóng pûn Yâ-sû tî.