《客語白話字聖經試讀版》

 | | | 轉寄

Yok-hon Fuk-yîm, Thi-5-tsông_1 Tshai Pit-sṳ-thai Suí-tshṳ̀-piên Yî-phiang

作者 Hak-ngî Sṳn-kîn 2008.08.10

約 5:1 Liá-têu sṳ yî-heu, yû Yù-thai-ngìn ke tsiet-khì; Yâ-sû tshiu sông Yâ-lu-sat-lâng hi.
約 5:2 Tshai Yâ-lu-sat-lâng tsiap-khiun Yòng-mùn fu-khiun, yû yit-héu tshṳ̀-thòng, Hî-pak-lòi-yîm ham-tso Pit-sṳ-thai, tshṳ̀ yû ńg-ke lòng-é.
約 5:3 Lòng-lí tî-poi yû yit-khiùn pot-phiang ke ngìn, mô-muk ke, pâi-kiok ke, pot thân-fûng ke, tshai ke-vi.
約 5:4 Ha̍p-tshai song-tsiet.
約 5:5 Yû yit-ke ngìn tshai ke-vi, pot-phiang yí-kîn sâm-sṳ̍p-pat-ngièn kiú.
約 5:6 Yâ-sû khon-tó kì soi tshai ke-vi, yu tî kì pot-phiang tshin kiú lé, tshiu lâu kì kóng: “Ngì oi tet-tó yî-hó mò?”
約 5:7 Phiang-ngìn en Kì kóng: “Tsú â ! Suí thîn-thûng ke-sṳ̀, ngài mò ngìn hó fù ngài lo̍k tshṳ̀-thòng;tén ngài sióng-oi lo̍k-hi, phe̍t-ngìn siên lo̍k-hi lé.”
約 5:8 Yâ-sû tui kì kóng: “Hí-lòi, nâ ngiâ tshó-tshia̍k, hí-lòi-hàng.”
約 5:9 Ke ngìn tsit-sṳ̀ tshiu tet-tó yî-hó, nâ kiâ tshó-tshia̍k hí-lòi-hàng. Ke- ngit he Ôn-sit-ngit.
約 5:10 Tsúng-he Yù-thai-ngìn ke liâng-siu tui tet-tó yî-hó ke ngìn kóng: “Kîm-pû-ngit he Ôn-sit-ngit, ngì nâ tshó-tshia̍k m̀ ha̍p fap-li̍t.”
約 5:11 Kì tshiu en kóng: “Sṳ́ ngài tshièn-yi ke ngìn, Kì yu lâu ngài kóng : ‘Nâ ngì-ke tshó-tshia̍k, hí-lòi-hàng.’ ”
約 5:12 Kì-têu mun kóng: “Tui ngì kóng fa,nâ tshó-tshia̍k hí-lòi-hàng,he má-ngìn?”
約 5:13 Tsúng-he tet-tó yî-hó ke ngìn m̀ tî Kì he má-ngìn; yîn-vi tshai ke-vi ngìn tshin-tô, Yâ-sû yu sám-khôi lé.
約 5:14 Heu-lòi Yâ-sû tshai Sṳn-thien tshìm-tó kì tshiu lâu kì kóng: “Khon-â ! Ngì tet-tó yî-hó lé, m̀-hó tsai fam-tshui, kiâng yu ngiâ-tó hàn kha thai ke sṳ.”
約 5:15 Ke ngìn tshiu-hi lâu Yù-thài-ngìn ke liâng-siu kóng, sṳ́ kì tshièn-yi ke he Yâ-sû.
約 5:16 Tsúng-he Yù-thai-ngìn tshiu pet-hoi Yâ-sû, yîn-vi Kì tshai Ôn-sit-ngit tso yî-phiang.
約 5:17 Yâ-sû en kì-têu kóng: “Ngâ Pâ kûng-tsok to kîm, Ngài ya tseu-yong kûng-tsok.”
約 5:18 Tsúng-he Yù-thai-ngìn kien-kâ oi sat Kì, yîn-vi Kì m̀ tân-tshiang yû pho-fai ôn-sit-ngit, yu tshṳ̂n Song-tsú tso Kiâ Â-pâ, tsiông tshṳ-kâ lâu Song-tsú phìn-tén.