《詩畫家鄉》

| | | 轉寄

Chung yit-chak mung chhôi thièn-hong...種一隻夢在田項

作者 Kông-làm...江嵐 2008.10.12

Chhôi â-pâ ke thú-thi-hong
在阿爸ke土地項
chung-lo̍k â-mê ke fa yit-ki
種落阿姆ke話一句
thin-thin-é lìm-súi cheu-ku
定定仔淋水照顧
ngit-ngit nâ chhak lòi liòng
日日拿尺來量
tén ko si-kui
等過四季
fûng-sông
風霜

Chhôi â-pâ ke thú-thi-hong
在阿爸ke土地項
chung-lo̍k â-phò ke ka-chông
種落阿婆ke嫁妝
man-man-é yet-hí
慢慢仔挖起
thùng-ngièn ke ki-yi
童年ke記憶
thèn-tèn â-phò ke
跈等阿婆ke
choi-mî
嘴尾

Chhôi â-pâ ke thú-thi-hong
在阿爸ke土地項
chung-lo̍k yit-theù fâ
種落一頭花
â-pâ ke hon-súi
阿爸ke汗水
â-mê ke vûn-yù
阿姆ke溫柔
chhôi thièn-teû-tú
在田竇肚
pot-mung 發夢

Yén-yén thâng-tó yit-sâng
遠遠聽到一聲
chhîn-chheù sṳ̀-chiet chhut-se ke â-kûng kóng
清朝時節出世ke阿公講
moi-é kâu â-mê tón-chhì
妹仔教阿姆斷臍
sûn-é thùng â-phò thiâm-chông
孫仔同阿婆添妝
then mak-ke choi-mî
跈麼該嘴尾
pot mak-ke mung
發麼該夢
yung-sîm lìm-súi ve-phì
用心淋水捼肥
sat-mâng tá-piang chang yû-yáng
煞猛打拼正有影

• 《詩畫家鄉》文章索引 | RSS | 寄給朋友
• « 上一篇 | 下一篇 »