《江嵐客家文學專欄》

 | | | 轉寄

台灣客人過五月節(4)

作者 Kông-làm...江嵐 2010.09.12

　　　　　　　　　　　　苗栗部份

　　苗栗部份：he吾ke故鄉，ngài小學四年生就有獨立thak粽仔ke經驗，該央時ngài兜搬去台北，吾姆oi上班，吾哥吾姐出外賺錢，吾姐（chiá）婆同ngài兜共下核，m̀過，佢ke目珠看m̀著，mò法度thak粽仔，ngài講過五月節he客家人ke大節日，定著oi祭祖拜阿公婆，恁大ke日仔，拜阿公婆定著oi有三牲、茶酒同粽仔正做得，屋下賸著一ke目珠看m̀著ke老人家同ngài這ke十歲ke細人仔，吾姆前一暗晡就同米浸好，粽葉同材料準備好，ngài讀書轉來he下晝頭四點零，開始洗粽葉、浸粽擐、 炒香料，thak粽仔，等ngài thak好生粽仔ke時節，吾姆就下班轉到屋了，續下來佢就開始煠粽仔，該年ke粽仔就he恁樣包起來ke！五月節he熱天ke開始，ngài兜客家人會ti這日拚掃屋肚屋背，五月節該日，oi去中藥店買雄黃粉還oi去雜貨店擐米酒，在屋前屋角hia雄黃酒（紅紅ke色同硃砂盡像，裝著衫褲洗就洗m̀起來，盡費氣。），ngài兜細漢ke時節，吾姆會lâu攪好ke雄黃酒用手指搵（vun）一下，在ngài兜ke額頭項寫一個「王」字，m̀過，自ngài兜搬到台北以後就mò恁樣做了。核ti鄉下ke時節門口有插艾仔、榕樹杷、香茅避邪，台北mò香茅，單淨做得ti傳統市場買著艾仔、菖蒲、榕樹葉紥好ke應景青草，記憶中，雄黃酒mò人拿來食！粽仔方面́有kî粽、米粽同粄粽，粄粽he米漿做ke，白色ke有攞一息仔鹽花仔。苗栗ke客家人盡注重五月節，這he吾姐講ke，吾姐he一位人文學家，佢對客家人ke文化風俗相當清楚，佢he江美萱小姐，佢講：客家人ke五月節有食五種菜ke風俗，又安著「五寶菜」，用吊菜仔、吊瓜仔、長豆仔、瓠仔、七層（yèn）塔共下煮一鑊，全家人共下做正餐食，食了做得解毒、反毒，蚊蟲不侵，食吊菜仔做得解毒，食吊瓜仔驅（kiuk）瓜鬼，食長豆仔做得長命百歲；五月節當晝１１點到１點he午時，該隻時間he落雨盡好，承起來ke雨水就he「午時水」，做得解毒，另外oi用艾仔、布驚仔、六月雪、月痱（pi）草（痱子草）、香茅全部共下炆一大鑊，歸家人用這ke水洗身，這兜草仔全部有香香ke味緒，ngài試著這五種草仔盡香，有故鄉ke臊味，還有梅雨季節帶來ke生菇弄脯，洗這草仔水做得解五毒、去瘴氣，平常時布驚仔攞菖蒲就做得燒來驅蚊仔。五月節該日，食午時水、食五寶菜、洗五草水做得pûn亻恩驅五鬼、解五毒、避瓜鬼，下半年身體kha平安順序，到七月ke時節kha m̀驚瓜鬼作弄，苗栗人五月節有拜伯公伯婆同灶公爺ke風俗，灶公爺he掌管食物之源、健康之本ke家庭守顧神，各家就有設神位奉祀。苗栗撐龍船比賽在明德水庫舉辦。

　　M̀過，龔萬灶先生講：客人ke三大節日he過年、五月節同七月半，八月半各族群就有過，m̀過，客家人對敬鬼神來講，七月半所oi準備ke祭品盡多，三牲飯菜燥濕食糧、金銀紙、面盆水、鈷衣（pûn孤魂野鬼洗手洗面，順續換淨利ke的新衫上桌食飯），種種ke祭拜禮俗來講，客家人ke七月半大過八月半。