《江嵐客家文學專欄》

 | | | 轉寄

台灣客人過五月節(5)

作者 Kông-làm...江嵐 2010.09.26

　　　　　　　　　　台中東勢ke部份

　　台中東勢ke部份：訪問著女詩人黎詩小姐同會計師劉淑櫻小姐，共樣he有包kî粽，黎詩小姐講來異詳細，佢講kî粽做得搵蜂糖、白糖也he豆油，鹹ke甜ke隨人食，米粽同其他地方共樣單淨包鹹粽，粄粽又有fûn甜ke、鹹ke，鹹ke包菜脯絲（sî）（m̀-he蘿蔔乾同桃園共樣he蘿蔔絲），靚豬肉、香菇、蝦pî、紅蔥頭等等，甜ke就包地豆粉(fû)（花生粉）；劉小姐講佢石岡該片甜ke he包花豆（通常加在剉冰肚那種大大顆ke花豆），五月節除忒拜阿公婆以外，還oi拜伯公，食吊菜仔會pûn人輕鬆mò病痛，食長豆仔做得食到百二歲，食桃肥，食李瘦。張振昇先生講：東勢ke客人旦旦就he打早先去拜伯公伯婆，再過轉來屋下拜阿公婆，阿公婆拜好過晝再過拜地基主，應該對大廟先拜，再拜伯公伯婆、阿公婆、地基主，人有天、地、君、親、師，拜神也有拜神ke倫理。這位oi補充ke部份he，客家人雖然省儉，m̀過對拜神當虔誠，拜過神明ke牲儀做m̀得拿來拜阿公婆。黎詩小姐同張振昇先生就有講著，佢兜東勢人mò插青（插艾仔、菖蒲）ke風俗。台中大安ke客家人，大部份he海陸人，佢兜ke粽仔kha特別，he用麻竹hap包ke長長ke甜粽，肚項包紅豆仔，日本話he a-chṳ-kí，這he盡特別ke所在值得研究佢ke來源。