《江嵐客家文學專欄》

 | | | 轉寄

台灣客人過五月節(2)

作者 Kông-làm...江嵐 2010.08.15

　　　　　　　　　　　　　　桃園地區

　　桃園地區：訪問著桃園龍潭ke黃勇秀先生，佢兜ke五月節有划龍船，地點he龍潭大池（當地人ke講法，俗稱「龍潭」），五月節he亻恩客家人ke大節日，大家oi去黃梅生紀念館拜阿公婆，oi備辦三牲（豬肉料、豆腐干《當地名產》、投生《雞、鴨、鵝，一項代表就做得》）lâu粽仔、水果這兜燥濕供品祭拜，客家人拜爺一定會獻茶、酒，尤其he酒做m̀得缺席，俗話講：「拜神mò酒跌mò筊。」意思就he講mò擐酒就m̀罅誠意，偏僻地方一時買m̀著酒，做得用生米泡水代表，安道「水酒」。五月節有拜伯公同地基主，客家社會重禮重道，對祖先lâu崇拜ke神明，四時多行祭祀，藉資崇敬，不論鬧市僻壤富裕貧窮，普遍虔誠敬拜，祈求安康吉祥。客家人ke伯公，he盡早開發地方，保土安宅者，在各地村莊寺廟肚項普遍就有供奉，家家戶戶ti收成前後年節就會祭拜，「伯公」也he客家人盡重要ke守護神。

　　鹼粽he用青色ke竹葉包ke，內容heki5粉lâu米攪勻用竹葉包起來，蒸熟後會變黃色，有香香keki5味lâu竹葉ke清香，盡餳（siàng）人食。米粽包菜脯絲、豆腐乾、三層肉、蝦仁、紅蔥頭等等，粽葉he用麻竹hap包ke，粄粽同米粽共樣ke料，粄粽he用糯米磨漿，再過用石頭磧燥了後包ke，白色ke粄粽皮mò攞艾仔；插青部份he艾仔、香茅、榕樹杷，這兜屋前屋後滿奈就有ke草仔掛在門口，龍潭黃家人mò用插青ke艾仔燒水洗身ke風俗，洗身ke部份he當晝頭煮午時水洗身，洗午時水做得pûn大細平安，m̀驚蚊蟲，對雄黃酒就mò麼該印象，m̀過，有食吊菜仔、竻（net）瓜、長豆、瓠仔ke風俗，龍潭盡特別ke he五月節有打粄圓ke風俗，粄圓煠好放等，唇項放一碗豆油，oi食幾鹹自家加，mò食甜ke習慣，除忒討親做好事以外，佢兜ke粄圓全部he食鹹ke，這點盡特別，別隻鄉鎮mò人打粄圓過五月節ke。

　　另外，訪問著從細在桃園楊梅出世ke鄭惠敏小姐，佢講，佢兜過五月節除忒 thak粽仔同拜阿公婆以外，mò食雄黃酒，也mò插艾仔、榕樹葉，這兜東西，me mò煮草仔水洗身ke風俗，m̀過，有食吊菜仔、竻瓜、豆仔ke習慣，還有食桃仔同李仔，有「食桃肥食李饑」ke唸謠，划龍船ke位所在龍潭大池舉辦；粽仔ke部份：有thak鹼粽同鹹粽，鹹粽又fûn米粽同粄粽，楊梅ke米粽底肚包蘿蔔乾、絞肉、蝦pî、香菇、紅蔥頭，看各家ke經濟情形加減內容，經濟kha好ke做得包靚豬肉ke豬肉角同蝦仁爆香加料，粄粽lâu龍潭共樣用糯米漿做ke，he白色ke，粽葉全部he用桂竹hap mò就he麻竹hap洗淨來包ke。