《江嵐客家文學專欄》

 | | | 轉寄

文化中心

作者 Kông-làm...江嵐 2010.07.18

　　今晡日玲容老師帶ngài去新營「台南縣文化中心」，這he ngài來台南一年零頭一擺去文化中心。

　　打早玲容老師來屋家載ngài，佢he ngài來麻豆熟識ke第一位朋友，佢盡有才華又當謙虛，當熱心ke細阿妹仔，得人惜又有人緣，行到奈位都有人熟識佢，佢載ngài去參加客家研習、楊逵文學營、西拉雅夜祭等等，總爺藝文中心有活動、麻豆柚花飄香音樂會、海埔池王府新春民俗表演等等活動都會通知ngài，佢he盡得人惜ke台南人。

　　台南縣文化中心堵堵好在該展覽得奬作品，有水墨、攝影、油畫、版畫、水彩等等，當幸運堵著得奬ke畫家，同佢請教這兜得奬ke圖畫，講著水墨各有見解，這下ke後生人mò耐心，m̀肯花時間練習素描ke基礎，先生就教佢兜用投影片作畫，m̀過畫出來ke作品總會有敗筆，陰影光線做出來ke效果mò靚，恁仰ke作品，老畫家當有意見。有一幅畫來當幼工，ngài試著畫家當有自家ke想法同幼路ke心思，佢ke圖雖然在畫框肚項，m̀過pûn ngài試著有跳脫畫框ke意境，ngài當合意該張。m̀過，該幅mò打頭幾名，打頭名該幅he水墨，單淨用烏白兩色表現，肚項畫ke he骷髏頭該兜怪力亂神ke東西，該he頹廢風，ngài個人mò合意這種作品，ngài行溫馨路線，mò合意頹廢風ke表現，社會亂罔亂，做得lâu社會亂象表現到作品項，mò問題，m̀過做m̀得鼓勵恁仰ke風氣。

　　辛苦經營打基礎畫出來ke東西，大體都得著入選定定，當然這兜人大體都he年紀較大ke畫家，頭幾名ke畫風做盡he魍魎鬼魅之類ke東西，得奬ke旦旦he後生人。文化藝術ke進步，m̀使守等舊教，正有進步ke空間mò m̀著，總he任何一樣事，基礎打m̀好，實力mò罅穩當，下二擺成功ke機會就較少，這正he ngài盡愁ke台灣教育。

　　聽這兜畫家講，這張圖有某麼該先生ke影，一看就知he麼儕ke學生仔畫ke，連圖上ke題字就he厥先生提ke，該字體大家me識，盡好笑ke he考美術系送件ke時節，逐張圖頂項ke字都共樣，面試ke教授看著就問學生仔，這字he麼人題ke，有兜學生仔會講自家寫ke，有兜較老實就會講he老師寫ke，細人仔憨憨mò經驗，其實教授又m̀ he憨仔，佢兜一看嘛知he麼人ke字體，he麼儕ke學生仔。

　　圖書館設在文化中心肚項，今晡日mò時間好看書，m̀過肚項書盡多，設備異好，這he ngài來台南以來尋著盡大ke資源，尤其he該間mò半儕人在該利用ke資料庫，將來做得做吾ke研究室。

　　臨暗，玲容老師講愛度ngài去天鵝湖，單淨聽著恁靚ke名，就pûn ngài想著世界盡有名ke芭蕾舞天鵝湖靚靚ke畫面，苗條ke身材，輕盈ke舞步，有藝術有愛情有當靚ke男女主角，浪漫ke氣氛當迷人。入秋時分，下晝五點邊仔，來到日頭紅紅ke臨暗，風堵堵好涼，同三兩ke好朋友行到木製ke人行道項，楊柳隨風搖擺，雨豆樹開等水紅色ke花，生來像羽毛球樣仔，he堵著落雨時，雨豆葉就會合起來，佢屬見笑花科，當得人惜；台灣欒樹開花合（ka̍k）打子，一樹ke秋意掛到淰淰，lâu恬靜ke天鵝湖加添色彩，噴水池噴出高高ke水柱，pûn風吹啊去，看起來像一大片ke水濂當靚當浪漫，這個時節he堵堵pûn日頭晟到，該片濛濛細雨就會變到七彩畫布，增加湖色風光，陂塘肚一群水鴨仔泅來泅去，排歸排仔一列長長當生趣，湖邊ke蓮葉大體都燥兮兮仔，賸到較mò風這片還浸青，開等幾蕊mò伴ke秋蓮，pûn人試著異孤恓。恁靚ke天鵝湖，水面項mò看著半隻鵝仔，當打爽，單淨有一對相親相愛放到入門口ke天鵝雕刻，pûn人體會天鵝湖ke氣氛。

　　行過新營街，看著一ke看板寫等〈大陸妹共匪餅〉ngài兜當好奇，車仔酊工停下來買，麵粉烰ke一隻長長膨膨看起來當有額樣仔，一隻十五ke銀，咬一口正知肚項he空殼ke薄皮，全mò內容，ngài講：「哇，正經he共匪餅，斷真he土匪，肚項根本mò料，真經pûn共匪打到，有影名符其實。」歸車頂人謔到鬧天。

　　文化中心he一ke多元ke心靈花園，有圖畫、繪畫、美術同各式各樣ke文獻資料。Ên做得來尋一垤心靈淨土，me做得享受繽紛ke藝術展覽空間，用自家合意ke方式去感受佢ke魅力。

　　2007/11/1