《江嵐客家文學專欄》

 | | | 轉寄

蓮池塘ke故事

作者 Kông-làm...江嵐 2010.06.27

　　有一隻kuái阿妹，邸ti蓮池塘肚項，日日hong床都鼻著香馞馞仔ke花香。

　　佢逐日對這蕊白色ke蓮花，跳過該蕊紅色ke蓮花，又對黃蓮花葉面，跳過吊菜色ke蓮花頂高，mò時閒。停下來ke時節，就在自家ke屋簷下彈琴看風景。

　　這蓮池潭除忒高天天ke蓮葉lâu靚靚ke蓮花以外，還有一座紅瓦屋頂ke細涼亭，涼亭唇有一片青油油ke青草地，青草生到盡旺盡靚。再過去he一片大樹林，遮天ke大樹做得避暑、做得聊涼。Kuái阿妹自從就m̀識離開這隻陂塘，佢認為這就he天上人間。

　　有一日，池邊來哩一隻著長靴筒ke老鼠仔，在大樹下彈吉他唱山歌，kuái阿妹自從m̀識聽過恁好聽ke歌聲，佢坐ti蓮葉下，微風涼涼，鼻等陣陣花香，pûn歌聲迷到失魂，mò酒也pûn佢醉茫茫仔，醉到日落西山吂魂醒。斷烏mò半夜ke時節，kuái阿姆尋來一看，kuái阿妹仰會坐到蓮花頂高睡忒哩，遽遽oi lâu佢喊醒，m̀過kuái阿妹對這時起就m̀識醒過來，日日昏昏痴痴在該吉他歌聲肚項回味，世間仰會有恁好聽ke音樂、恁好聽ke歌聲？Kuái阿姆看著kuái阿妹ke病越來越傷當，m̀像事，就請當多醫生來看，兔仔先生看過、鳥仔醫生乜來過、連深山肚ke山羊先生也請來，mò一個見效。Kuái阿姆盡愁慮，滿奈就請人救厥妹仔。M̀過，日仔一日一日過，還he mò人救得醒厥妹仔。

　　下後，蓮池肚ke長老想到一個辦法，喊人去尋該日在池邊唱歌ke老鼠仔。M̀過，老鼠仔m̀ he歇ti大自然ke所在，該隻人家肚項正有ke大老鼠，oi去奈位尋？Kuái阿妹同kuái阿姆平時做人就異好，大家盡思量佢兩子哀，所有蓮池塘ke kuái仔總下出去人家屋竇尋老鼠，大家就帶衫褲擐飯包，抹籮抹掣趕緊出門。

　　Kuái阿哥lâu kuái阿叔，m̀知仰會恁慶，真經尋著該隻老鼠來，kuái阿妹看著該日彈琴唱歌ke老鼠仔，一下目珠擘大大蕊，魂醒過來。

　　大家看著kuái阿妹魂醒過來盡歡喜，該暗晡就在蓮池塘，舉辦一場盡盛大ke音樂會，對臨暗唱到天光。

　　第二日，著長靴筒ke老鼠oi轉該下，同kuái阿妹講：「你一定oi有自信，你自家就he一個人人訶腦，盡豐富ke聲樂家、文學家，好ke才華大家做得互相欣賞，m̀使一定oi自家擁有，做自家才情ke主人，正能成為真正ke哲學生活家，盡多人乜共樣欣賞kuái阿妹ke才情同聲頦，希望你再加油，就像細細隻ke花點姑仔跋到峎頂m̀自滿，百尺竿頭又再過飛上天。」

　　Kuái阿妹明白老鼠ke心意，就相約各各轉去後，oi在自家熟行ke領域(vet)，不停ke進步，pûn世間有較多較好ke歌聲，有較多較好ke文學。

　　對這年開始，蓮池塘就成為老鼠哥同kuái阿妹，每年發表音樂會ke舞台矣。