《江嵐客家文學專欄》

 | | | 轉寄

卡度小公主(下)

作者 Kông-làm...江嵐 2010.05.23

卡度小公主：

　　卡度小公主ke名仔安到A-bin，he頭人盡惜ke屘妹仔，生來幼秀又盡靚，留等一頭烏軟秀麗ke長頭那毛，ngài意外發現卡度ke細人仔特別靚，除忒大目珠以外，佢兜都有一撩秀氣ke雞卵面。A-bin因爭兄弟姐妹眾多，又有人緣，故所逐日都會有四面八方ke兄弟姐妹送食糧過來，打早五點零過來ke he厥姐，佢日日都會lâu朝晨雞嫲正生出來ke雞卵同田坵項正摘轉來ke青菜，放在小公主屋家ke圍牆頂高，m̀使喊醒佢兜；其他ke阿姐也會對遠遠ke所在送來竹筍、番瓜、豆仔、冬瓜、青椒等等農作物，阿叔時常對澎湖空運新鮮ke海產過來，故所小公主屋家ke食物大體都m̀使出去買，連雞、鴨、鵝仔都he自家畜ke，阿舅成時me會送來幾尾佢自家釣ke淡水魚或者蝦公、毛蟹；he堵著部落肚有人家做生日也he細人仔滿月，有人新屋重建ke人家都會上山打山豬，所有來飲酒焙肉ke親戚朋友，等打鬥敍結束ke時，就做得帶轉去一垤山豬肉分享。差m̀多逐擺來小公主屋家，都做得食得著佢兜到山頂打轉來ke萋萋山豬肉，一入口就知，該種萋度同口感，絕對m̀ he一般市面項賣ke飼料豬做得比ke。

　　A-bin ke大心舅後生又靚，佢名仔安到i-bu，佢除忒有一個鴨卵面，還有一雙好手路，mò論手工藝ke技巧或者家庭環境都整理到有條有理，廚藝又特別好，mò論麼該菜，單淨經過佢手頭煮出來ke做盡香甜好食，又香又有味緒，pûn人ke口涎水就會流出來，來過厥屋家ke人，mò人mò欣羡這位m̀ he原住民，續比原住民還較原住民ke好心舅，i-bu目珠大大蕊目眉毛異粗，烏肉烏肉，盡隨和，當笑面，嘴嫲又好，故所人緣盡好，食過佢ke料理保證會尋尾，會常透想著佢。

　　A-bis he小公主A-bin ke長子，有一擺A-bis帶平地朋友上山打獵，當mò簡單正看著一隻山兔仔，大家歡喜到煞猛趜該隻山兔仔，山兔仔前腳短後腳長，故所he上山比下山走較遽，一群mò打過獵ke朋友拚命緊趜，趜到山峎頂ke時，眼看就會趜著咧，A-bis一聲令下，喊大家m̀好過趜，平地朋友眼見就會到手ke獵物奈肯sot手，硬硬oi走過去，A-bis大嫲聲喊講：「該片過去就he鄒族ke地界，ên兜做m̀得再過過去咧。」大家聽著趕緊停下腳步，心肝肚當佩服原住民ke守信制度，佢兜心中自有一條索仔，m̀使法律去規範，逐個獵人都會遵守lâu尊重族群同族群之間ke生活公約，即使在這荒郊野外，mò人看守ke地界也m̀會犯規。佢兜狩獵ke時節，單淨做得捉成年ke鹿lâu其他動物，母鹿lâu細鹿仔，其他動物me共樣，oi留來做種，做m̀得捉淨淨，布農族一路里來保持等這兜保護大自然ke傳統原則，這種信念值得ên兜學習。

　　卡度小公主A-bin為人親切友善，親戚朋友都當合意佢，佢盡好客，做人又大方，故所厥屋家來來往往ke人客盡多，ngài兜逐擺來厥屋家就像he轉外家樣仔，厥心舅總he準備當多當季出產ke青菜pûn ngài兜帶轉去，這擺ngài轉來堵好堵到風搓季節連連續續帶來ke拚大雨，麻豆地區滿奈就淹水，吾屋面前me淹到當高，pûn人當愁慮，好在有i-bu lâu ngài兜準備ke當多糧食，he mò在這鄉下所在，前mò搭村後mò搭店，想oi出門採買又大雨拚拚滾，在屋簷下就做得涿到濕透透，莫講he出門去，屋面前積水嫩尺深，me mò法外度出去，巷仔肚ke水既經淹到大馬路來咧，這場拚大雨所造成ke災害不小，真感謝小公主一家人送ngài ke食物，使得pûn ngài兜不致於斷糧。

　　卡度部落he雲ke故鄉，也he豐衣足食ke人間天堂，歸隻部落就像he一個大家庭，大家因為分享故所快樂，mò分你ngài都分享得著佢兜ke熱情，也分享醲醲ke人情味，這位邸等一群得人惜又當靚ke布農人，這he台灣ke烏托邦。　

　　　　　　　　　　　　　　　　　　　　　　　　　2007/8/13