《江嵐客家文學專欄》

 | | | 轉寄

卡度小公主(上)

作者 Kông-làm...江嵐 2010.05.09

　　埔里仁愛鄉有一ke卡度部落，該位邸有三百零戶ke布農族原住民，這位民風篤實大家就當親切，單淨在這位行嫽，逐儕人看著你，m̀管識也m̀識都會主動同你相借問，聽著佢兜用親切ke鄉音lâu ngài相借問，ngài都會試著自家he佢兜ke同族人，也自然ke會學幾句布農族ke語言，同佢兜互相問好，逐擺來卡度部落都會邸佇小公主屋家。


卡度（katu）部落：

　　卡度部落在仁愛鄉中正村，西北he埔里，北片有水頭山，南片he大尖山lâu卓社林道，部落肚項種盡多檳榔樹，卡度部落he離埔里最近ke原住民部落，因爭目珠看哪過做盡he檳榔樹，故所這隻所在me安到「檳榔部落」。這位氣候穩定時常就he藍天白雲，故所也pûn人安到「雲ke故鄉」。部落底肚人口大約有1200儕，四成he未成年ke細人仔，其他旦勢he老人家較多。卡度（katu）he盒仔箱仔或者船仔ke意思，應該lâu這位ke地形有關係。部落最大ke特色he村肚有兩條路，一條he平等巷，部落村民又lâu佢安到「光明大道」；一條he光明路mò安路燈，村民講該he「地獄路」暗摸摸。造成光明大道同地獄巷ke原因，聽講he承包路燈工程ke包商為著oi減低工程成本，偷工減料，官商勾結lâu原來設計安裝在各道路巷道ke水銀路燈，做盡集中在mò到一公里ke平等巷搓（chhài）落去，故所，每10公尺搓一支路燈，還在路ke兩片析都設立，變成平等巷每5公尺就有一盞路燈，一到暗夜，平等巷燈火通明，像he天堂，貶倒轉來，其他巷道烏疏疏仔像地獄樣仔，形成奇特ke景觀，最嘲謔ke he安到光明路ke道路顛倒mò路燈。因爭這奇怪特別ke現象，到了暗夜餳（siàng）來不少埔里lâu鄰近鄉鎮民眾走來夜遊欣賞，讓卡度（katu）部落帶來夜間遊嫽景點。卡度（katu）部落（中正村）滿山ke檳榔，企在檳榔林ke感覺當夏威夷，布農族ke狩獵圖就設計在卡度部落入口ke所在，牆面上畫等盡多lâu原住民傳說或者風俗有關ke圖案，對埔里入來，大約三十分鐘ke車程就到得，卡度部落he布農族卓社群最大部落。

　　為著oi pûn傳統耕種「小米」文化深層植入卡度部落發展，同時展現部落文化特色風情同魅力，南投縣仁愛鄉中正村社區發展協會，識在卡度布農田園教學區舉辦「布農族播種祭」活動，這ke祭典he布農族最重要ke祭典之一，象徵一年耕種ke開始，活動肚項m̀單淨做得聽布農傳統祈福歌謠，還會介紹祭典ke由來lâu意義。

　　布農族傳統儀式肚項，耕種ke祭典儀式大體he照月光lâu星仔ke運轉同變化來進行，佢兜相信等到西方ke天狼星消失ke時節，就做得開始捼種ke工作，因爭在傳統信仰肚項，等天狼星消失以後，就he雨季來臨ke時節，山林ke霧水也將降臨大地，滋潤土地，使得捼下ke農作物順利成長，pûn一年豐收。

　　故所布農族會選在捼種日該日ke半夜，由主祭者將穀倉特別留起來做種ke小米，裝到簸箕放佇屋家ke中央，再過弒（chhṳ̀）一隻大雞公，將血淋淋仔ke雞公在小米種頂項酊圓圈仔祭拜。捼種期間，各戶人家定著oi遵守「飲食ke禁忌」，做m̀得食弓蕉、蕃薯、番豆、甘蔗等等鹹ke、甜ke食物，一直到捼種捼好為止。布農人相信，假使違背這兜禁忌，該年所種ke小米m̀單淨會生來mò靚，還會pûn鳥仔食淨淨。