《江嵐客家文學專欄》

 | | | 轉寄

喊花hong床ke人

作者 Kông-làm...江嵐 2010.04.18

　　朝晨五點睡醒，天既經大光，想講歸禮拜mò鬆爽，精神異差，趕日頭吂出來，出去圃園細路仔項行行咧。

　　打早行過細路ke草竇，腳趾踢著青油油ke草竇肚，he昨暗晡星仔留下來ke目汁，薄薄ke日花仔晟過來，青草項ke露水一聶（ngia̍p）一聶像天頂ke星仔樣仔，金金亮亮。

　　行過耕種人家，歸排ke籬笆楠楠吊吊ke燈籠花，逐蕊就還在該睡目。庄下人盡煞猛，果園肚麼个都有，柚仔打到結結，打到籬笆外背出來，尖頭楯尾ke he文旦柚，歸粒圓圓ke he白柚，佢兜總he湊（chheu）等來開花打子。柚仔樹矮矮仔，今年雨水落到盡勻，柚仔枝pûn雨水磧到強會貼地。

　　鳳凰花開ke時節，酪梨me吊到歸樹頂，浸青ke酪梨pûn日頭照到亮亮，逐粒就當得人惜。改良種ke番檨大粒又紮腹，舊曆五月節前後大番檨也熟矣，耕種人驚怕蜂仔來叨，逐粒就用紙落仔袋到好勢好勢，看著青林林ke果樹項掛等白白ke紙袋仔，續變做當生趣ke畫面。

　　在都市生活ke時節，打早路過ke人，大約仔都he出來運動ke人較多，這下在庄下，路項堵著ke人，m̀ he駛鐵牛就he載傢拉伙準備oi落田做事，一ke老阿公仔兜一碗公飯，坐到屋簷前ke矮凳頭，腳跤起來食飯，he堵著過路ke鄰舍就緊食飯緊打嘴古，老阿婆仔擐等錫桶在屋背後餵雞鴨，田坵項洩(sie̍t)藥仔ke人趕雨較lo ke時節，趕遽洩較煞猛兜仔。

　　台南麻豆這ke所在，較少看著人種一大坵田ke菜園，除忒蒔禾以外就he羊角田，mò就he歸大片ke柚仔園，me有歸大坵ke棗仔園。

　　田洋細路ke鳥仔mò麼該會驚人，m̀管在電線頂項企歸排仔在該唱歌ke屋簷鳥，也he在田坵落食ke白鶴仔，在草竇肚尋蟲蝨打草蜢ke阿啾箭，也he飛來飛去ke白頭翁，人行過去全mò感覺，輕鬆自在自由絡食，看著佢兜認真唱歌、自由自在，就像楊逵講ke：「情願看土面，m̀願看人面。」看起來核在庄下ke鳥仔，連人面就m̀想看。

　　舊曆四月尾蒔落田ke羊角，看起來還幼幼嫩嫩，m̀過，田坵酊酊（tîn）圓，滿奈就he紅紅ke福壽螺，ngài知講禾仔吂生穀串該下，做得放鴨子落田去食草，恁仰耕種人就m̀使挲草拈福壽螺，ngài就問官田這位種羊角ke人家，做得放鴨仔落田食福壽螺mò？鴨仔會連嫩嫩ke羊角苗me食淨淨mò？哦，鴨仔正經會連羊角苗就食淨淨，lâu ngài想ke共樣。

　　行一輪田園風光，倒轉來人家屋前，看著梳妝打扮好ke燈籠花，逐蕊就開容笑面，當有精神企在籬笆頂曬日頭，七點半邊仔，上班上課ke人來來去去，大車細車走上走下，mò閒ke一日又oi開始矣，鳥仔吱吱喳喳唱山歌，蟬仔唧唧唧拔喉嗹頦，山狗大me走出來看鬧熱，樹頂ke果子，圍牆肚ke花，做盡煞煞hong床，雞仔喔喔滾緊喊人去上班。