《江嵐客家文學專欄》

 | | | 轉寄

一日里長

作者 Kông-làm...江嵐 2010.03.22

　　今晡日又去做一日ke里長，庄頭庄尾滿奈就去巡巡仔，附近ke柚仔做盡摘淨哩，耕種人在柚仔樹下挖溝仔放肥料，婦人家戴等紅蘿花色ke笠嫲，在青油油ke羊角田肚項摘羊角，看啊過去，he一幅靚靚ke農村風景。

　　行到曾文溪唇項，一條長長青青ke石剝，種歸路仔ke苦楝樹，堵著新冬時節，一串一串ke苦楝樹子青色ke、黃色ke，楠楠吊吊婆嬤淬杈，山阿鵲、白頭翁在樹頂飛來飛去，lâu冷靜ke天色摝到燒暖燒暖。

　　這條石石剝he幾年前，麻豆大水災過後拆忒做過ke，當時規劃到當好勢，有種樹仔、起涼亭，還特別打一垤一垤ke花磚，有各種各樣ke動物、花色，m̀過幾下年mò人管理，這下細路仔兩片生哩歸排仔蝦公夾，秋風一吹，就開起一路白花，黃揚擛、白揚擛唸唸飛，lâu安靜ke下晝頭變到當浪漫。

　　石石剝下he柚仔園，he堵著柚仔花開ke時節，歸大片ke白花青葉，目珠做得享受清涼ke色目，鼻公做得鼻著香噴噴仔ke柚仔花香，正月時節帶親戚朋友來這遊嫽，歸路仔ke柚仔花跈等你行，鼻到精神當好。等到柚仔熟ke時節，掛到叮叮噹噹青到發光ke柚仔，看到口涎水就會跌下來。

　　另外一片he曾文溪，跋上石剝頂，想看白芒芒ke娘花，人講：多就he靚。十一月中，娘花定著開到盡榮。等ngài跋上石剝頂，看往下，唉唷！仰會mò白雪雪ke娘花呢？曾文溪唇有黃花水草，白鶴仔在水邊絡食，看起來當合色，幼幼歸大片ke雜草，分秋風吹啊過，像海浪樣仔，當好看。行較過去兜仔正發現，原來麻豆這段河灞ke娘花he咖啡色ke，華語安到「蘆葦」，m̀ he白色ke五節芒，m̀過，me mò盡多，同ngài想看著ke光景差當多，有小可失望。

　　河灞唇有一ke老阿伯仔在該翻土，有兩三ke婦人家在該捼種，這下人，mò人用腳頭改田地，旦旦he用機器翻土，細細台ke機器，做得調大行也he細行，一路送（súng）等去，一行一行ke廂頭又靚又直，十分方便。新冬頭大家旦勢he種番豆、包粟，mò就he蕃薯、蘆筍，這兜較耐寒ke農作物。看著大家恁煞猛耕種，就盡像看著種落一粒期待ke心，有種就有希望，有希望就有收成。等到收成ke時節，堵堵好過年，休耕ke農地，多多少少做得貼兜仔辦年貨ke零星錢，me有好分細人仔兩隻仔紅包。這坊農期較m̀會堵著做大水、發風搓，雖然講這下種ke農作物經濟效益m̀ he當好，總愛肯做就有好食，加減種啦，閒me閒忒，總比人在該賭狗較贏。

　　講到賭狗，剛下行過庄頭伯公下，正看著一大群男仔人在大榕樹下圍等行棋仔，有幾ke坐ti大樹下打嘴古，講著政治話題，一儕比一儕較大聲頦，比手畫腳，精神百倍，新曆過忒年正月講愛選舉，佢兜堵堵在該批評奈隻候選人仰般仰般，歸伯公下鬧熱煎煎仔，還生趣哪。該片屋簷下，一群婦人家在該擘羊角，該he做件仔ke，論斤算工錢，看麼人手腳較遽就賺較多錢。大家圍圍共下，緊擘羊角緊打嘴古，下把仔me笑到大嫲聲，m̀知在該講麼該天闕。

　　看起來，ngài這一日ke里長，當顧家，奈隻角仔都行透透，就增差mò擐涼水請佢兜食定定。

　　　　　　　　　　　　　　　　　　　　　　　　2007/11/16