《江嵐客家文學專欄》

 | | | 轉寄

鳳珍ke咖啡

作者 Kông-làm...江嵐 2010.03.07

　　宗教lâu政治he當主觀ke見解，he mò盡熟識ke朋友，ngài盡量m̀會同人談論這種敏感ke東西；飲茶lâu飲咖啡乜共樣，he依自家ke口味歡喜合意為原則，故所送人茶米lâu咖啡，就像he做人ke心舅共樣，yi難合人意。

　　鳳珍送ngài一包HOYA ke即溶咖啡，平常時ngài總he食ngài自家ke古坑農會生產ke咖啡，前兩日聽著鳳珍一段盡有意義ke話，pûn ngài思考幾下日。佢講：用中國話寫ke文學過較多、多到會驚死人，乜單淨he多語多元ke台灣文學底肚ke一部分定定。文學寫人，文學ke語言應該he寫土地ke人講ke話，也就he土地ke語言；用土地最熟識ke語言，寫土地ke故事，恁仰ke文學正he真誠感動人ke文學。明明就會講台灣母語ke文學創作者，he講一心單淨想繼續用殖民者所帶來ke語言來創作，m̀肯煞猛去實踐母語文學創作，這般充滿妥協ke殖民語文學，究竟he為中國人創作？抑he為盡多盡多講台灣母語ke台灣人創作？母語文學正he台灣文學ke光，台灣文學he講想oi展現佢ti世界文學底肚ke特殊性，oi靠母語文學，正會ti世界發光。一ke台灣人，oi先看得起自家，用行動來表達對自家ke阿姆話ke尊敬，正會看得起自家ke文學同國家。台灣人he講mò決心、mò志氣，ên就mò正常ke國家、光彩ke國家，台灣人he本本oi生m̀死ke個性，驚死怕事ke話，這種個性ke人he mò法度寫出一流ke文學作品。

　　想著鳳珍ti静宜大學「第二屆海翁文學營」文學夜談座談會講ke話，害ngài幾下日睡m̀落覺，今晡日思念鳳珍，拿等杯仔泡佢送ngai3ke咖啡，緊飲緊試咖啡ke味緒，緊飲緊體驗佢ke文學觀，還有佢對台灣文學ke期待苦心，HOYA ke咖啡緊飲緊苦緊有味緒，ngài慢慢試著苦中ke甘味，甘中ke香醇，慢慢仔體會佢講ke話。飲鳳珍送ngài ke咖啡，續愛著佢ke味緒，一ke愛台灣、愛阿姆話、愛土地ke俠女。為著台灣人ke尊嚴lâu自家ke尊嚴，總he m̀肯認輸、m̀肯放棄，堅持用佢細細仔ke身體去實行、去爭取，佢就像一粒細細粒ke辣椒仔共樣，細細粒ke辣椒仔辣死歸桌頂ke人客。 　　　　　　　　　　　　　　　　　　　　　　2006.8.3在大里