《江嵐客家文學專欄》

 | | | 轉寄

過年

作者 Kông-làm...江嵐 2010.02.28

　　逐年過年辦年貨，ngài總oi lâu吾朋友講笑：「還得人驚哦，外背滿奈都兵荒馬亂。」

　　在台北過年ke時節，因為上班ke原故，定著oi等到三十暗晡正放嫽，盡尾日正有時間好辦年貨，臨時赴及，盡多東西oi採買。Ngài這兜職業婦女，盡會在上班時間順續款私家，過年期間m̀管he銀行、郵局、菜市場、百貨公司、美容院……滿奈就he人山人海，人尖人、貨堆到比山還較高，等你擐到大包細包ke時節，盡冤枉ke he有錢就喊m̀到計程車，著等狹裙套裝高踭靴ke上班族，手項擐等大擐細擐ke雜細，he一個盡生趣ke畫面。M̀過，ngài總會當有效率辦好這兜事情，甜粄、發粄、菜頭粄ngài會先註文好勢，金香炮燭me會先打電話麻煩店頭家準備好勢，等ngài過去納錢就做得擐走，毋使耗時間在該等，lâu細人仔買新衫，拚屋拚灶做得提前，買年菜正he大麻煩，青菜定著oi等到三十日正買，粄仔me共樣，三十打早oi先去市場買菜、買水果。

　　前一暗晡還oi去買當多花，ngài想ngài前生人怕he花精來出世ke，除忒陽台種ke花就算咧，還oi買喜氣洋洋ke應景年花，歸屋間滿奈就he花，花香滿廳堂，目珠擘開來就看著花ke笑容，鼻等花ke香氣睡目，有一種天上人間ke趣味。大家就知ngài oi花成痴，年下仔me會有人送盆景過來，反正吾ke人生lâu花同咖啡分m̀開，浪漫又固執。

　　客家人對伯公盡敬重，定著會先去拜伯公，上家下屋提早拜年，大家就恭喜來恭喜去，歸伯公下鬧熱煎煎仔，大人細子蘿格牲儀備辦到盡澎湃：「恁久mò看著，孫仔就恁高矣。」有兜人在外位做事，難得過年轉來，有ke新心舅，就單淨結婚該日看著一擺定定，路項相堵頭就認m̀識哦，難得拜伯公ke時節還做得順續認親，你講客家人he m̀ he盡會相惜。拜阿公婆，三牲五禮不可少，甜粄、發粄、菜頭粄，糖仔、麻粩、星仁糖，柑仔、黃梨同蘋果，還oi準備兩粒結紅綵ke年柑磧神桌，金黃色代表金銀財寶好年冬，聽講拜爺oi用圓圓ke供果，表示圓滿，m̀知he奈位傳來ke風俗，總he圓滿最好。除忒以上有講著ke供品外，還oi準備雞盤、封肉、長年菜、竹筍、魚仔、蘿蔔湯，一大鑊米飯lâu碗筷，汽水同酒不可缺，對這時起三日三夜mò斷香。

　　團圓飯食飽，就開始發紅包，阿公坐佇廳下食菸，阿婆手項拿等歸大疊ke紅包，阿婆mò輸像開銀行樣仔，分紅包盡大出手，別人仰般發紅包ngài m̀知，吾屋家he對盡細ke開始發，新出世ke新丁子盡紅，自古就有母以子為貴ke風俗，新丁子有先拿紅包ke權利，連做阿姆ke me共下先拿到第一隻紅包。這時，大家就會喔喔喊，lâu氣氛炒到熱噴噴仔，阿公阿婆ke紅包，歸屋家人大大細細總下有，m̀會跌忒一儕人。再過來he回敬，賴仔同心舅共下包磧年錢分爺哀，倆公婆倆公婆共下來，賴仔、心舅ke磧年錢大部份就比爺哀包ke較大包，he有孫仔、孫心舅ke me會來回敬，結婚過ke就算大人，吂結婚ke mò限制，隨自家ke意就做得，mò包也mò相干，m̀過，旦旦都曉得在過年時節包分世大人紅啊咧，這he客人一路里來ke禮教。細人拿著磧年錢就出去打紙炮、打紙牌，搞到m̀知人，he mò喊轉來睡目，就搞到m̀知好上眠床；大人泡茶食瓜子，打嘴古、講政治，婦人家在灶下mò閒到捩捩轉，mò到半夜就mò停手，盡辛苦，m̀過，收到紅包ke燒暖，做得lâu一年ke疲勞消除淨淨，故所恩哩ke紅包文化，還he有情有義，異生趣ke禮俗。

　　客家人還有一個特別ke禮俗，年初一朝晨oi食齋，意思he年初一食齋就代表歸年仔就食齋，食齋還有食齋ke智慧唷。食芹菜表示勤勞，鹹菜he同人攞（lô）得，和諧ke意思，芥菜he聰明有計，豆腐食了就大富大貴哪，食豆腐乾就做得升官發財，發粄代表發財ke意思，蘿蔔粄he好彩頭表示好運到啦。當晝又還oi食蔥仔，食咧會聰明巧巧，蒜仔食咧就會籌也會算，韭菜食咧就做得長長久久，食這兜菜做得分大家一年順序大平安，碗筷加一雙he希望再過添丁ke意思，故所客家人盡有智慧唷！

　　年初二轉外家，大包細包ke等路，阿公阿婆還oi炆糯飯分你帶轉去，淺黃色ke糯飯，有香香ke弓蕉油羴(hien)，糯飯面項有香到分你流口涎ke白麻仔，大家就盡訶腦客家人ke糯飯又靱又香當好食。阿哥也he老弟，成時he外甥仔會駛車來載，這he客人ke禮貌，阿姑轉外家he大事，阿舅、舅姆、表哥、表姐全部就會圍過來，轉外家ke心情，做妹仔ke人正知得，一種轉外家做嬌ke幸福滋味，he人間盡靚ke禮遇，故所人講婿郎he「嬌客」原因就在這位。

　　轉外家了後，就oi遽遽轉屋家準備，跈等就有親戚朋友來行春，還有盡多社會社團，來來往往ke親朋好友會來嫽，立法委員、縣議員lâu縣長、市長me會在過年時節來坐嫽。M̀過，堵著同學、朋友就盡鬧熱，mò在這食晝、食夜，就mò算好朋友，還oi lâu後生時節ke古老事情搬出來溜麵線，等老朋友、老同學轉去，該兜青春少年ke輕狂事，續變做子女拿來消遣阿爸阿姆ke點心。

　　對一個職業婦女來講，四、五日ke年假真經mò罅用，過一ke年，對ngài兜來講像he脫忒一層皮。初五開張，行入辦公室，大家嘴項講：「恭喜，恭喜，紅包收幾多？」逐儕就哀哀鯽鯽，喊腰骨軟痛，痶死了。細人過年著新衫、收紅包，婦人家過年做到喊m̀敢。

　　　　　　　　　2007年在西拉雅柚仔樹下過年 （登佇台文戰線）