《江嵐客家文學專欄》

 | | | 轉寄

想念ke季節

作者 Kông-làm...江嵐 2010.02.14

　　為著oi去台北教育廣播電台上課，故所選擇去一位律師屋家歇，南海路ke植物園，有ngài做細人ke影跡，十五、六歲ke時節，逐日朝晨五點就hong床，lâu谷阿伯共下來植物園學三才劍同太極拳。一直到搬下台中生活，ngài還會想著這位ke蓮花，逐年五、六月就會轉來行一輪。對ngài來講，這位ke蓮花he pûn ngài思戀ke花，he吾ke相思花。

　　律師ke屋，離植物園m̀使十分鐘ke腳程，he盡讚ke住所，二十零年前熟識佢兜，在佢ke事務所上班，這兩日邸厥屋家，同佢兜共下，做得看著佢兜單純ke生活模式，lâu簡單ke人生價值觀。

　　律師he一位多才多藝的才子，佢he一位專業律師，me在大學教授法律課程，又he一位愛國詩人，到今年為止已經出版十六本文學著作，得奬記錄不勝多，還特別為著紀念厥父親創辦一個基金會，奬勵好學後進，鼓勵文學創作，希望台灣能有過較豐富ke文學文化。

　　律師ke夫娘，he一位賢能ke賢內助，後生時節在學校做先生，結婚後因爭家務繁忙，辭忒教職工作，專職相夫教子，服侍家官家娘，打理先生ke行程規劃lâu打點盡多複雜ke人際關係，還oi教育三個細人仔。表面上看似簡單，其實在名人圈肚項，內內外外ke的人情事故，oi處理圓滿就mò恁該唷，盡多人都會請一位專職ke秘書幐手打點，m̀過律師夫人總he一儕人恬恬仔承擔。當初在佢兜ke事務所上班ke時節，逐日就看佢出出入入，像he一粒極樂仔共樣，mò閒到捩捩轉。

　　現下家官家娘過身矣，細人仔me大咧，逐儕都有穩定又異好ke頭路lâu美滿ke家庭生活，孫仔隻隻都當得人惜，律師ke成就一路飆漲，就像績優股樣仔長紅上揚。

　　律師夫人在幾下年前跌倒中風，出院後手腳mò靈活，m̀過，mò論人生路項仰般辛苦，佢總he盡有擔當，逐日盡煞猛運動健身，只希望自家遽遽好起來，mò想連累屋家人，在佢ke打拚下，逐隻月都有進步。這擺，對台南轉來台北，做得同二十零年前ke老頭家聚總，me了ngài一ke心願，知得佢兜一切平安順序，ngài就做得心安。

　　Ngài因為家庭變故搬到鄉下，軟弱ke ngài又斷忒一雙翼胛，早就飛m̀起來矣。這擺轉來台北，看著律師夫人ke堅強，pûn ngài盡尊敬，ngài兜講盡多話，人生、哲學、社會、家國，還有頭過大家相處ke點點滴滴，大家都非常珍惜這一段緣份，me互相鼓勵對方加油生活落去，ngài真經真經oi好好同律師夫人學習，勇敢堅強ke企在自家崗位項。

　　又he一個蓮花盛開ke大熱天，植物園肚ke荷花、睡蓮、花花草草都開到繽紛燦爛。律師夫人執意oi送ngài到植物園肚ke教育廣播電台，ngài揹等包袱仔，緊行緊講，一下仔就到目的地，落雨ke街頭濕濕滑滑，ngài盡愁佢一儕人轉屋，ngài兩儕人相攬話別，互道珍重，ngài穿過馬路再回頭，佢還企佇建國中學該片相送，黏時兩行目汁直直下，煞猛lâu佢揲手（ya̍k-sú），請佢轉去，佢慢慢仔搬等助行器，徏動身體，一步一步仔行轉去，ngài停動m̀得企在該位，佢行幾步腳就斡轉頭看ngài一下，雖然ngài會遲到咧，還he看等佢彎過街角圍牆，輕輕仔講一聲：「Sai-yo-na-la」。

　　恁樣ke溫情，恁樣ke天時，做得轉到童年生長ke台北，就在這感恩ke季節肚項，溫習人生ke功課際遇；時時感恩，心存忠厚，相信感動同幸福就會在四季花開ke日仔肚項成長。
　　　　　　　　　　　　　　　　　　　　　　　　　2006仲夏