《江嵐客家文學專欄》

 | | | 轉寄

苦學四年見花開(下)

作者 Kông-làm...江嵐 2009.11.22

　　喪事期間還oi走派出所同法院、戶政機關lâu葬儀社，還有來來往往ke親戚接駕跪拜。恩he出外人，若大伯姆講若爸死在外位，做m̀得轉去故鄉葬佇祖墳，為著這件事情，你同若老妹都試著當委屈，噭歸暗晡夜mò睡。堵著做七、做齋仔ke時節，冷冷清清，陰森森ke殯儀館肚項，歸排仔ke靈桌同過身人ke相片，在深夜，pûn人看起來當得人驚，還有淒淒謔謔ke噭聲，lâu和尚仔囹囹滾喊魂ke聲調，在恬靜ke殯儀館肚項，pûn人發尸驚ke氣氛，你乜he忍等你ke mò膽，牙齒nga̍t等忍一路過來。一直到若爸還山，火燒圃園ke大熱天，帶等若老妹去火葬場，續等又將骨灰送上山頂進塔，看等你細心細意lâu逐件事情力求圓滿ke態度，pûn ngài試著盡感動同安慰，mò論圓七也he對年，你乜曉得款若爸生前好食ke東西來拜。雖然你he妹仔，ngài總he教你過年過節祭拜lâu掛紙，應該準備ke東西，同祭拜ke禮儀，你當有心，故所學來異遽。

　　若爸mò福氣，mò看著你大學畢業，ngài想佢一定當遺憾！故所希望你做得去同若爸講一下，你既經大學畢業哩，pûn佢歡喜一下。

　　時間就在你日連夜夜連日ke mò閒當中度過，今晡日看著若ke成績單，同學嗋（hia̍p）講：「喂！你仰做得考恁高分呢？」聽著這句話pûn ngài當安慰，你雖然日日做到mò日mò夜，還he有煞猛讀書，順序出業。主任同先生在吾面前訶腦你，恭喜ngài，盡敗勢ke人應該he ngài，放你一儕人出外打拚，mò同你幐手著麼該，試著當過意m̀得。這四年來，oi承蒙若學校ke先生lâu同學，還有pûn你方便，因為下把仔mò赴到交通車，你自家坐火車去上課，去車頭接你ke同學lâu學姐，還有在台中pûn你盡大資源ke林阿姨、惠茹、子弘，同平常就當會相惜你ke頭家娘、朋友、同事。He mò大家ke鼓勵lâu支持，今晡日就mò恁該拿著這張畢業證書，真經當承蒙大家ke照顧lâu相惜。

　　你著等學士衫，帶等ngài同老妹歸學校捩捩轉，四年前ke細樹仔，這下生到比你較高，企佇蠡澤湖唇對過寒梅大樓翕相、在世代錦囊紀念碑聽你講古、行入你盡沙鼻ke圖書館尋詩人ke腳跡，文學步道、書法藝廊，逐位就帶等ngài兜去遶，堵著同學乜曉得同ngài紹介，其實你盡得人惜，逐擺轉屋家來就會同ngài講麼儕又麼儕照顧你ke事情，故所你同ngài紹介ke時節，逐儕ngài就m̀會生疏，正曉得同佢兜講恁仔細。你出車禍ke時節，一年生ke先生許淑華老師照顧你盡多，佢he你盡想同佢講恁仔細ke人，你興嘟嘟仔走去辦公室尋佢，結果今晡日佢mò來學校，你當失望，你盡想當面再過同佢講一聲「恁仔細」；看你恁有人情，恁曉得想，ngài試著盡歡喜。

　　恩兜大家mò食夜，都留下來陪你共下看花火，花火在湖面ke天頂一蕊一蕊仔開花，該央時堵堵好mò落雨，花火開佇天頂映佇湖面，還有你看著當滿足ke面容，你緊講oi pûn ngài感受一下，有花當面開ke體驗，真經有影。逐擺雙十節放花火ke時節，總he遠遠看過去，就試著盡靚哩，mò想著這擺企佇花火天下，逐蕊花火就當面散開，有滿天星斗萬條金線、也有五花十色ke放射線、有水面水底倒漀（chiang）ke火楯（tún），還有天頂開等紅蘿花色ke各種圖形，該種花火為你開ke感覺，斷真當mò共樣，盡有臨場感，還靚哪！看到當過癮，你講過忒年還oi倒轉來學校看花火。Ngài一生人就m̀會m̀記得，在你大學畢業ke暗晡夜，恩歸家人共下看花火ke快樂同幸福。

　　 2008/6/7在西拉雅柚仔樹下