《江嵐客家文學專欄》

 | | | 轉寄

鳥仔大會

作者 Kông-làm...江嵐 2009.12.13

　　打早，鳥仔七鼓八笛，在窗門前、屋簷下，m̀知開麼該大會，平常時正三隻、兩隻，零零星星在窗門前，遊嫽唱歌絡食。今晡日，m̀知he討新娘也he做生日，特別大陣，屋前屋角、電線項、牆圍頂，一陣又一陣，吵到像菜市場樣仔，五、六點天甫光就飛來吱吱喳喳。

　　Ngài hong起來lâu佢看哪，有白頭翁、屋簷鳥lâu燕仔。白鶴仔盡少飛兼人家屋，m̀-he在田坵絡食，就he停ti樹尾嫽涼，今晡日也一大群一大群飛來鬥鬧熱。

　　這兩日堵著南部翻耕禾收成，割禾機器行過ke所在，後背跈等歸陣歸陣ke白鶴仔、阿啾箭、禾畢仔lâu屋簷鳥。禾頭下盡多肥zut-zut仔ke蟲蝨草蜢，做得pûn佢兜食到頦滿肚飽。Ngài盡佩服這兜鳥仔ke目水，逐隻鳥仔都在高高遠遠ke所在飛過來，當精準就啄得著蟲仔，目珠還利哪，幾下公尺外ke東西就線得到，一息就無爭差準準準，啄啊著就飛上天，目珠利到耐m̀得，連煞青出名ke客家人，就跈厥ke腳板m̀著，實在還慶哦。

　　今晡朝晨天吂光，這陣大大陣ke鳥仔走來吾屋背後，算來he開麼該大會呢？哦，原來就he鳥仔ke豐年祭啦。


　　　　　　　　　　　　　　　　　2007/11/4在西拉雅柚仔樹下