《江嵐客家文學專欄》

 | | | 轉寄

pûn七年生ke妹仔

作者 Kông-làm...江嵐 2009.10.25

　　聖帕風搓帶來狂風大雨聶爧響雷公，胚想妳怕曉得準備手電仔同蠟燭，還有泡麵食糧呵？外背風雨當大，盡量m̀好出外，假使he試著會驚就尋兜朋友做伴，恁仰正做得pûn身心得到安頓，暫時lâu風搓天當做he修心養性ke假日me m̀會濫。

　　Ngài一路里來就m̀知oi恁般面對妳ke成長，還有妳該一味單淨想摘天邊月，m̀願留心身邊花草ke個性，恁仰ke個性單淨會帶pûn妳m̀快樂，me會mò安全感，恁仰ke個性盡像若爸，你兩儕人都pûn ngài當mò奈何！雖然諄諄唸唸，你又lâu若爸共樣聽m̀入耳，我當然知妳盡惱ngài拿妳同若爸做比較。M̀過，這he mò法度改變ke事實，因為ngài愛妳，也oi若爸，你兜不切實際ke生活態度，pûn你兜過來mò自在又m̀快樂，這點he ngài盡大ke煩惱同愁慮。

　　雖然妳mò想oi聽，ngài還he耐心ke希望妳明白，人生ke路途當長，個性he做得改變ke，就看妳願m̀願意改變定定，從細妳就知得阿姆pûn妳ke庭訓「習性定江山」，一個人oi有樂觀、開朗、感恩、知足ke個性，無論處佇貧富有無，心胸單淨oi歡喜開朗自在，就做得生活到快樂又有滋味，這he用錢買m̀著ke，又會影響妳一生成敗ke關鍵。

　　人生he透過不斷學習成長正會增長智慧ke；就像ngài輒輒講ke：「有盡多會寫詩ke人，mò一定he詩人；當多m̀會寫詩，續生活到怡然自在、恬淡清心ke人，定著he詩人。」七年生ke妳，ngài m̀敢企求妳這下就做得會知麼該人生大道理，m̀過，盡少ngài希望妳學會感恩、知足。珍惜一個人ke自在，me珍惜兩儕人ke精彩，珍惜每一個真實現在，生活出生命中最燦爛ke光彩。M̀好因為驚自家創傷就lâu自家捆起來，pûn 愛妳、欣賞妳ke人mò法度接近妳，恁仰會打爽忒妳ke美貌同青春年華ke歲月，盡對不起ke he妳自家黃金期ke容顏。

　　自從若爸過身，ên ke生活過來m̀好，m̀過，除忒生活以外，ên還oi學習接受目前ke處境，lâu mò法度改變ke事實。雖然ngài對一ke好命碌碌仔ke地位，跌到柚仔園ke泥竇肚，這m̀ he ngài生涯規畫ke一環，歸隻過程都嚴重打亂吾ke生活步調，雖然落難到鄉下，ngài me oi揇等ngài僅有ke微薄自尊為你兜惜命，就算ngài無能力在經濟上lâu你幐手，盡mò me做得在精神項等等pûn你兜需要靠岸ke時節，還有一個家竇做得做避風港，或者妳會認為這個屋he mò存在ke，根本做m̀得算he家。M̀過，ngài oi lâu妳講，阿姆在奈位，奈位就he若ke屋，了解mò？無論妳在外背受到幾多風雨，ngài都會在這位展開雙手隨時支持，pûn妳偎靠同安慰。

　　真希望ngài ke用心良苦妳做得明白，ngài過較願意妳受傷ke時節做得自我療傷，恁樣正做得保妳一生平安。想oi有這ke能力就定著oi回歸原點，開始學習妳ke生命課程，改變妳自家ke個性，還he該句老話「習性定江山」，有好ke個性、有遠見又曉得感恩惜福，將會帶pûn妳一生人平安同財富，這財富定著he內外兼具ke成果，希望妳做得聽入耳，還做得接受這當讚ke建議，妳假使m̀肯改變個性，妳ke人生會行到當辛苦，也會pûn ngài心痛。包尾，願妳在人生路項健康平順。

2007暑假