《江嵐客家文學專欄》

 | | | 轉寄

青蓮(2)

作者 Kông-làm...江嵐 2009.09.13

　　2002年11月，ngài在中山醫學院開刀，佢就曉得請假去院項照顧ngài，該央時佢正讀國中定定，佢lâu厥舅姆兩儕人輪流換班，一直照顧到ngài出院。當久佢就m̀敢pûn ngài擐重ke，出外又驚別人撞到ngài，坐車ke時節還會交代司機先生m̀好tun-fuk仔，驚怕吾ke傷口裂開來發炎，事事項項佢就顧到細心細意，pûn ngài盡感動。

　　大學一年生，厥爸過身，臨時決定oi搬去學校附近同佢做伴，對一個十八歲ke細人仔，忽然間失忒阿爸，打擊當大，佢一定oi緊調整自家，佢看當多書又lâu自家ke內心對話。一直到有一日，做出一份〈紀念父親〉ke PowerPoint動畫，pûn電腦先生盡感動，又在班上當大家ke面屙腦佢，後來，佢就慢慢仔收起悲傷ke腳步，定定仔行入日頭下。當然在該做〈紀念父親〉ke同時，一遍又一遍選相片，貼相片入電腦，為厥爸寫一首當長ke紀念詩，oi打字上去，又oi選背景音樂，捉秒數算時間，整整舞忒佢歸日ke假期，乜在電腦面前，面對厥爸ke相片一遍又一遍出現在目珠前，pûn佢噭忒歸日仔。Mò想著，等佢做完這個作業，心情加當輕鬆，除忒厥爸ke保庇，佢盡承蒙厥ke電腦先生蘇耿弘老師。怡嫺想，這he自家唯一做得對厥爸做著ke紀念，就lâu這垤光碟燒出來寄pûn阿伯、阿叔、阿姑同舅姆、阿姨，大家看著光碟就緊看緊噭，又打電話來屙腦佢，大伯lâu三伯講：「厥爸降（kiung）到恁賢孝ke妹仔，這一生人也價值咧！」對這擺開始怡嫺正漸漸仔行出自家ke心靈路線，到下學期就有較好ke表現。

　　因爭厥爸過身，今年過年ngài三子哀mò方便轉去過年，就留在瞨（phio̍k）屋ke柚仔樹下，親戚朋友m̀盼得ngài三子哀在外地過年，山m̀轉路轉，續換佢兜來柚仔樹下看ngài兜。平常就當好煮食ke怡嫺，看著恁多人客來，好講m̀講：「媽，he度佢兜去餐廳食，一儕人算二百就好，十儕人就oi用忒二千銀，ngài看ngài自家煮好啦。」煮飯ke時節，佢喊ngài出去陪人客打嘴古，佢lâu灶下門關起來，m̀肯厥舅姆lâu阿姨幐（then）手，等佢煮熟出菜ke時節，一盤一盤ke菜色，有靚靚ke色目又有豐富ke變化，每出一盤大家就喔喔喊：「哦，還(hàn)靚哪！」「哦，這盤看起來當好食ke款！」「仰會恁會煮呢？」「這下已經mò奈尋恁慶（khiang）ke細阿妹仔咧！」單淨這點就pûn厥舅姆lâu貴鑾阿姨這兩位mò降（kiung）妹仔ke阿姆欣羡到耐m̀得。舅姆lâu厥姨就講笑講：「恁會煮食，做得嫁人咧。」怡嫺顛倒講：「He哇，he合意ngài ke人，乜oi同吾姆當有話講正做得。」厥舅姆對嘴應仔去：「Ngài看哪，你下二擺嫁人ke時節，將就lâu若姆共下嫁過去好咧哪！」這句話一出，大家就謔到m̀會停動。