《江嵐客家文學專欄》

 | | | 轉寄

青蓮(3)

作者 Kông-làm...江嵐 2009.09.20

　　怡嫺he吾ke貴人，佢識救過ngài兩擺命，第一擺he核在台中ke時節，有一暗晡，ngài忽然間得到急性尿道炎，半夜兩點尿血，怡嫺強強喊ngài hong起來換忒睡衫，煞煞騎車仔載ngài去醫院掛急診，去到醫院驗血驗尿，先生講：「He拖到天光，一生人就oi洗腎！」該哉，有一ke恁惜ngài ke妹仔，就像he慈悲ke菩薩，pûn ngài避過一劫，真經盡承蒙怡嫺。

　　第二擺he在台南，半夜兩點肚笥痛到醒起來，面色kap青，痾利肚痾到脫水，耐到天光ke時既經手腳酸軟，mò力好騎車去pûn先生看，因爭核在庄下，mò親mò戚好幐手，連計程車就mò奈好喊，好得怡嫺載ngài去pûn先生看，佢總he細心細意照顧ngài，pûn ngài試到盡溫暖，佢就像he一ke細媽媽樣仔，準備三餐，問寒問暖，歸日仔就在身邊顧等ngài，佢看ngài緊昏睡，十分m̀放心，因爭有阿爸ke離開在先，pûn佢當mò安全感，佢當驚ngài一睡就m̀會醒，故所一下嘴角唚一下，一下額頭tu̍t一下，測量看ngài有發燒mò？實在就lâu ngài吵到mò好歇睏一下，m̀過，ngài當了解佢ke驚心事，故所乜歡喜甘願pûn佢摝。

　　Ngài時常會為著文學活動走上走下，成時轉去台中主持詩人大會活動，mò就he上台朗讀自家ke詩作，2007年詩人節在台南，台灣文學館舉辦ke〈相招府城來吟詩〉活動上，怡嫺當煞猛lâu ngài翕相，當多人會過來屙腦ngài兩子哀感情恁好，佢就會同人講：「我以我媽媽為榮。」聽到ke人就欣羡到耐m̀得！其實，一等幸福ke he ngài。

　　學校攝影社社員推薦佢出來做下任ke攝影社社長，m̀ he因為佢ke攝影技術比別人較好，佢正開始學習定定，ngài想可能he佢ke人緣好ke關係啦，佢he一ke有主見又敢講話、明事理ke細妹人。逐擺下課ke時節，同學就會湊等出去嫽，佢就會講：「Ngài mò閒，ngài oi轉去煮飯pûn吾姆食。」大家就當懷疑，算來仰般，大家總he轉去食阿姆煮ke飯，仰會佢oi轉去煮pûn阿姆食？這就he ngài比別人較幸福ke所在，因為ngài有一ke貼心又曉得，得人惜ke妹仔，佢he一蕊盡靚盡靚ke蓮花，睡目ke時像觀音，開花ke時全世界就鼻得著佢ke清香，看得著佢ke笑容，其實佢正he吾ke驕傲哪！Ngài正he盡幸福ke阿姆！在吾心肝肚項日日就開等一蕊青蓮。

2007/7/19在西拉雅柚仔樹下 （登佇台文戰線第8號2007/10）