《江嵐客家文學專欄》

 | | | 轉寄

青蓮(1)

作者 Kông-làm...江嵐 2009.09.06

　　「怡嫺」he吾ke滿妹仔，人講：「滿子滿嬌嬌，mò豬肉m̀食朝」，又講滿子食較有乳兼怕有影，從細就當惜佢，因爭佢老實又善良，故所對佢ke教育，同聰明又有主見ke阿姐mò共樣。

　　「怡」這隻字he：快樂、和順ke意思；「嫺」（hàn）：形容文雅熟練ke意思。

　　會安這隻名，多少有受到古人講ke：「願生子兒愚且魯，mò災mò難到公卿」ke影響，希望妹仔出世過後做得平平安安，mò愁mò慮過一生人，客話就喊佢〈異閒〉（悠閒的意思），m̀使愁食用。

　　怡嫺從細就當貼心，記得幼稚園該下，有一擺帶佢倆姐妹去遶百貨公司，厥姐看著百貨公司賣ke〈芭比娃娃〉，各式各樣世界各國ke做盡有，堵堵店員在該推銷。逐隻細妹人就有母愛ke天性，還細時節總會揇等人公仔學人做阿姆，店員看著吾妹仔當想oi，就捉準細人仔ke心理，認為機會當大，故所對ngài紹介香港、美國、荷蘭等等mò共樣國家ke〈芭比娃娃〉特色，店員越勢紹介，大妹仔就越忍m̀核（he̍t），就在ngài m̀知oi仰般推辭ke時節，細妹仔怡嫺就走過來大聲響氣講：「我媽媽沒有錢，不要叫我媽媽買啦！」佢盡命牯拉等吾手oi離開現場，唇邊其他ke爺哀聽到佢講這句話，又看等佢拉ngài ke動作，大家就謔到大嫲聲，所有ke爺哀就散淨淨。當時，吾目珠擘大大粒帶等笑容看佢，一直在吾心肝肚嬌詩又溫柔ke佢，仰會今晡日恁勇敢又曉得，真經還得人惜哪。就還吂有90公分高，頭那毛還tha̍k二隻角ke幼稚園細人仔，仰會恁慶。這件事情常透pûn ngài拿出來屙腦！下後細人仔到國中ke時節，帶佢兜去遶百貨公司，ngài正知講oi lâu佢兜交代講：「買m̀起ke東西，就he你mò需要ke，做m̀得透支來買。」

　　小學三、四年生he細人仔盡會大ke時節，衫褲lâu鞋襪吂舊就著m̀得，沒幾隻月就oi買過一雙鞋，加mò幾久又oi買過衫褲，開銷當大。該年oi過年ke時，大妹仔ke新衫已經買好咧，怡嫺因爭年紀細又生來比人較高大，he買像厥姐恁大年紀ke衫分佢著會忒過老款，想oi買較堵好佢著ke，又mò恁大領ke。有一暗晡tâng工帶等佢去買過年衫，遶歸暗晡仔，著仔得ke當貴，較便宜ke又著m̀落，兩儕人行到當暗就mò買到堵好ke。佢在路項停下來，拉等吾手講：「媽，m̀使lâu ngài買新衫啦，ngài著姐姐（che-ché）ke就做得咧！」仰會有恁仰ke細人仔呵？過年né! Ang合（kha̍k）厥姐比佢較矮又較細粒子，厥姐ke衫佢根本就著m̀得？吾心肝想，這隻細人仔仰會恁貼心、恁知頭天，pûn ngài試到當m̀盼得！Ngài he職業婦女，當時雖然he當暗又當痶咧，ngài續ti暗夜肚看著一蕊開著當靚當靚ke蓮花，該柔美、該光彩he ngài一生人惜命命仔ke香味。