《江嵐客家文學專欄》

 | | | 轉寄

圓一隻尋根ke阿姆節(4)

作者 Kông-làm...江嵐 2009.08.30

　　Ngài-teû跈等又去三義木雕博物館，該位ngài盡熟，就遽遽同表阿舅還有舅婆展寶，吾姆這兩年春節，都有在這位展覽詩作同雕刻家共下展出，吾姆還有在這位朗讀佢自家做ke客家詩作，ên入去看今晡日展覽麼該好mò？唇項該條細路仔做得看著當靚ke油桐花，跋到峎頂就做得看著滿山茶園，盡靚哦。舅婆妳行得贏mò，敢oi上去？舅婆講：「妳兜後生人上去就好，ngài mò法度吔。」因爭舅婆mo3b oi上去，故所大家就mò去行該條盡靚ke桐花路，雖然ngài同阿姆都試到盡打爽。M̀過，ngài-teû mò可能同八十零歲ke舅婆放ti這，自家上去嫽，ngài扐等舅婆ke手臂，陪舅婆在街路項散步，看人賣東西。到這下ngài正發現，吾舅婆同別個老人家mò共樣，對下晝出門到這下，佢m̀會滿奈買東西，擐到大包細包，顛倒看著別個叔婆伯姆擐當多鹹菜、覆菜、蘿蔔乾，這兜客家名產。對停車場看啊下，做得看著山頂雪白雪白ke油桐花，近近遠遠ke油桐花，在ngài-teû客家人ke心肚項開花，日日夜夜開mò停，這he阿公阿婆ke故鄉，me he阿姆ke故鄉，做得企ti客家人ke山頭，跈等阿姆ke腳步，轉到阿姆出世ke所在，he阿姆ke幸福，me he吾ke幸運。He m̀-he為著驚敗勢，ngài盡想企ti這位唱一條客家山歌，pûn阿姆ke故鄉聽。

　　今年ke阿姆節，做得跈阿姆轉到胞衣跡，pûn ngài試到盡感動。又做得同阿婆ke親戚lâu表阿舅、表舅姆，還有表兄弟姐妹大自家聚總。客家人有一句盡靚ke話語：「親戚像把鋸，你有來ngàI就有去。」親戚真經oi有來有去正會親。

　　同親戚世大人揮手告別，一路盤車正轉到屋，一到屋就收到表阿舅寄來ke名產，佢驚ngài-teû擐忒重，又愛盤幾下枋車m̀方便，還驚阿姆細義m̀肯收等路，就恬恬仔用寄ke，除忒佢兜當有名ke紅酒以外，還有細人時節食過ke番薯餅同米粻（chhàng），紅、黃、白長長ke三色夾心餅，這兜童年時節ke糖餅，he盡pûn人懷念ke零搭，盡承蒙表阿舅、舅姆lâu舅婆大家ke款待，ngài永久m̀會m̀記得，這he ngài同阿姆盡有意義ke阿姆節。

2008/5/11阿姆節