《江嵐客家文學專欄》

 | | | 轉寄

圓一隻尋根ke阿姆節(3)

作者 Kông-làm...江嵐 2009.08.16

　　來到龍騰斷橋，經過一座橋，阿姆遽遽喊細表舅停車，佢緊講：「就he這位，就he這位，阿哥你停車一下，ngài oi入去看吾爸吾姆！」細表舅旋旋風，m̀知阿姆在該發麼該癲，恁急oi喊佢停車。阿姆拉等吾手來到一片塚埔，風水一穴一穴離當近，拶拶个風水一門又一門，差m̀多無路好行矣，踏過別人風水唇ke圍牆，又看著頭前還有一穴一穴ke風水，尋有一下仔，阿姆緊唸：明明就行著方向，就在這附近，仰還mò尋到阿公阿婆ke風水，吾姆當天才就講：「媽，你在奈位，帶ngài過去哪。」正講忒，行過二穴風水真經就pûn佢尋著，害ngài雞嫲皮緊起，仰會恁靈。阿姆單淨開嘴喊一聲：「爸、媽……」喉嗹頭就硬忒矣，ngài遽遽拿衛生紙分阿姆捽目汁，過一下仔，阿姆正做得好好同阿公阿婆講話。佢像當多話愛講，噥噥噥噥講當久，ngài煩惱表阿舅同舅婆在外背等忒久，拉一下阿姆ke衫袖追佢好來去矣，阿姆目汁捽捽咧，又sen一下鼻，ngài驚佢噭過，看m̀著路會跌倒，故所就牽等佢，行過高高低低ke塚埔。

　　這片塚埔he相絲樹同油桐樹包等ke山林，細細粒黃黃ke相思花，吊到尖尖長長ke葉面，當像he韭菜煮粄圓，一個長來一個圓，黃泥土地透氣ke聲，he阿姆ke鄉音。

　　過上去he一片青油油ke茶園，一行一行ke茶園，浸青ke茶葉，pûn人看著心情當開陽，香香ke味緒，提神醒腦，阿姆在茶園項行來行去，像he在該行軍點將樣仔，阿兵哥著等歸身ke青衫青褲，排到直直，總司令在頭前行來行去，看起來盡威風。

　　來到油桐樹下，看著阿姆像細人仔樣仔，跍佇路唇拈風吹下來ke油桐花，拈當多，就lâu佢排一ke愛心，喊ngài翕相起來做記念，又企ti相絲樹下目珠眨等，兩隻手伸開來捩捩轉，做當大ke深層透氣，緊鼻相思樹ke味緒，佢講該he厥ke生命來源，me he厥故鄉ke香氣，難得轉到出世ke胞衣跡，定著oi鼻到罅擺來正肯轉去。表阿舅從細就盡寵吾姆，故所佢做得了解阿姆ke心情，同接受阿姆ke浪漫情懷，舅婆也當惜阿姆，總he試到吾姆當天真得人惜，歸路仔就pûn吾姆弄到笑瞇瞇仔。

　　頭一擺跈阿姆同姐婆來到九華山，he一個冬尾ke日仔，風當大，盡寒，吾爸駛車仔上來ke時節，歸粒山頭都he濛沙煙，強強會看m̀著路來行，下車ke時，強強會pûn風飛走，企就企m̀核，阿爸插等阿婆行入大廟上香，該央時姐婆ke身體mò好，腳me mò力，吾爸一路里來就盡賢孝，照顧姐婆照顧到mò話講。Ngài還記得，該擺在這位堵到一個外國人，吾姆還走過去訪問佢對奈位來，該外國人講he比利時人，阿姆又問佢，仰會擎香拜爺，敢會試到台灣人當迷信，比利時ke後生人講，擎香拜爺he尊重這位ke風俗，拜爺同祈禱共樣，he心靈寄託，基督教徒心中有主，台灣人心中有神，故所天下歸一統，大者見同，小者見異，信仰he人心盡好ke皈依。
　　 今晡日he阿姆節，雖然姐婆mò在矣，相信姐婆有靈，時時刻刻就在ngài-teû身邊，看等ngài-teû，保護等大家。

　　舅婆帶ngài-teû來ke he，新起ke佛教聖地苗栗銅鑼鄉九華山大興善寺，he 2005年11月11日半夜吊載三寶佛、大細佛像，在千過信眾虔誠護送到這位，長幾下公里ke車輛，拖拖挷挷遷徒來到三叉西湖，當時lâu下南ke車路照到燈火通明，沿路佛祖ke面me pûn電火照到盡好看，親像大佛暗夜出巡ke樣仔，十分莊嚴。舅婆帶等ngài-teû來大殿拜三寶佛，吾心肝肚緊求佛祖保庇吾姐婆往生西方極樂世界，安享天年。再求佛祖庇佑舅婆身體紮增食到百二歲；希望辛苦ke阿姆做得一生人平安順序，m̀好過頭操勞。

　　這下he五月時節，m̀過，這位ke風實在還大，雨me落來盡大，天時有兜仔像該擺同姐婆來ke時節共樣，在這又看著莊嚴ke三寶佛，pûn ngài愐到盡惜ngài ke姐婆，還有同姐婆共下ke燒暖幸福日仔，忍等目汁跈等舅婆下樓，大家拜爺拜好都會在這位食一碗大麵。這間廟盡特別，mò pûn人提香油錢，食麵食飽，愛出來ke時，還有人在該位送菜pûn人，吾姆講：「Ên mò同佢兜添香油就試到當敗勢矣，仰做得同人拿菜呢！」