《戀戀台灣客家文學》

 | | | 轉寄

桐花新娘(7)

作者 Suingi 2011.03.13

　　雪緊落緊落，秋妹堅持出院，m̀管大家仰般勸佢，佢堅持oi有嫻帶佢去神龍村。有嫻mò辦法，在醫師許可下，有嫻sung等輪椅，帶阿姐婆去神龍村。

　　雪緊落緊落，滿山ke四月雪緊落，秋妹用志風送ke油桐花夾仔lâu頭那毛夾起來，正oi到神龍村入口，佢堅持用怙杖仔行一段路，雖然mò行幾遠，有嫻心肝續七上八落，驚怕阿姐婆跌倒。一看著志風ke塚埔，有嫻嚇到講m̀出話。

　　風又吹過秋妹lâu志風，目汁模糊了時間ke界線，桐花雪緊落緊落，帶佢轉去該年……。

　　長長ke頭那毛佇風中飄揚，同秋妹歡喜靂天ke心情共下飛揚。本旦當難行ke山路，這下走起來也像街路án穩當。秋妹像一隻白鶴仔，歡喜到會飛起來。佢想煞煞同志風哥講：「阿爸答應ên-lí ke婚事哩！」

　　雪緊落緊落，一到神龍村ke出入口，甜蜜ke種種回憶湧啊上來，佢停下腳步，想起同志風哥講過ke話。

　　「哈哈！人家講油桐花像雪，ngài看佢一團團，kha像新娘捧花。」
　　該央時，佢想：「可惜án幸福ke新娘捧花，風一吹，續散忒，散做滿山雪。」

　　M̀過這下看起來，桐花雪乜當浪漫！

　　佢正án-nè想，目珠續睞著麼个石頭。

　　行前詳細看，佢險險講m̀出話來：「志……志風哥？」

　　千算萬算m̀當天算，志風哥mò辦法等佢咧！塚埔葬在桐花林，面向神龍村出口，就像志風哥還守等兩人ke誓言。該日，秋妹噭到心會挖出來，暈倒在志風墳前。

　　風吹了過來，桐花散作滿山雪，哀悼佢兩儕ke愛情。

　　Ngài來咧，你續走咧……

　　後來ngài嫁pûn別人，你會譴mò？

　　秋妹目盯盯仔看等志風ke墳，恬恬mò講話。

　　包尾，逐年四月桐花開，佢都會來看佢。

　　秋妹就án-nè跌入回憶，一直到有嫻扼等厥手，想安慰佢，佢正回神過來。

　　「來，阿姐婆lâu你講故事……」秋妹笑笑仔，目汁續緊流下來。