《戀戀台灣客家文學》

 | | | 轉寄

桐花新娘(6)

作者 Suingi 2011.03.06

　　白雪雪ke……桐花啊……

　　Ngài還愛去神龍村討吾志高新娘……

　　咳咳！

　　范秋妹睡ti病床，目珠花花，假使醫療機械mò緊滴滴答答，假使護士小姐講話聲he鳥仔聲，風又吹了過來，像該年……像該年吹到桐花像雪。

　　「秋妹。」該片儕，淨有佢會án-nè深情喊佢。

　　「秋妹。」佢老咧，老到輒常聽著志風哥喊佢。目一ngia̍p，目汁又跌下來。

　　「秋妹。」哈！聲音án清楚！

　　范秋妹目珠擘開來，風又吹落桐花，佢看著志風哥咧！

　　「志風哥！」幻覺也好！麼个都好！佢單淨想緊緊揇等佢！

　　強忍oi跌下來ke目汁：「Ngài來咧！Ngài來咧！Ngài mò騙你！」

　　「Ngài知！」志風哥對佢笑。

　　「帶ngài走！這擺ngài mò-oi ko離開你咧！」秋妹還he二十零歲ke模樣，厥志風哥還án緣投。

　　「秋妹，敗勢。」雪緊落緊落，寒天吂到啊！

　　志風哥對佢笑：「愛記得收生日禮物喔！」

　　「啊！」范秋妹擘開目珠，伸手，佢看著自家後生ke面容。

　　「阿姐婆！」該乜he有嫻ke面容，佢扼等秋妹手，笑笑仔講：「Ngài今年m̀知走麼个運，堵著當多怪人喔！有一ke人安做胡志風，佢強oi ngài送你等路！實在he怪人！」

　　有嫻打開志風pûn佢ke錦囊，拿出一支缶仔做ke油桐花新娘捧花夾仔，放到阿姐婆手項。風又吹過來咧！看等捧花，秋妹yi像又聽著人講話。

　　「哈哈！人家講油桐花像雪，ngài看佢一團一團，kha像新娘捧花。」

　　「新娘捧花？該he麼个？」

　　「西洋人結婚該時，新娘會拿等ke捧花啊！佢會lâu佢擲出去。」

　　「擲出去做麼ke？」

　　「祝福下一對有情人幸福啊！」

　　秋妹激動緊嗽，嗽到目汁闌干，有嫻遽遽喊護士小姐。