《戀戀台灣客家文學》

 | | | 轉寄

桐花新娘(8)

作者 Suingi 2011.03.20

　　有嫻同頭家約定好ke兩禮拜，一下就到咧！

　　「福爾摩沙」飲料店順利推出「客家週」系列限定茶，結合桐花季，確實當好賣，但he盡餳人客ke，m̀-he茶本身，he影印在茶杯仔頂項ke故事。

　　神龍村為著發展桐花季，本旦打算請胡屋lâu志風ke塚埔徙位，驚怕觀光人客一入神龍村就看著風水，會嚇著，結果這茶杯仔頂項ke故事續pûn當多人tâng-tâng走去神龍村看這塚埔，顛倒帶起神龍村ke觀光。

　　頭家對有嫻十分滿意，但he有嫻堅持辭職，也要求做m̀得洩露作者資料，就án-nè離開公司，連手機仔號碼也換忒，挑挑oi佢尋m̀著佢。

　　越神秘，人家越好（hau），「客家週」系列限定茶賣到當好，頭家續當心痛大家注意著kèm-he茶本身。

　　Mò人知有嫻到nái去，佢講阿姐婆ke故事pûn佢當大ke震憾，有當多東西mò這下去把扼，一轉身，就逐m̀轉來咧！佢想oi一步一步去追求自家ke夢想，m̀想到老正反悔。

　　桐花雪緊落緊落，正知風又吹了過來。