《戀戀台灣客家文學》

 | | | 轉寄

桐花新娘(5)

作者 Suingi 2011.02.27

　　「嗯嗯！Ngài了解若心情，但he，ngài m̀-he范秋妹，ngài he曾有嫻啊！」聽了志風ke故事，有嫻正知佢仰一看著佢就緊喊：「秋妹」。

　　「Ên這片mò麼个桐花季，先來ngài這歇一日，天光日正帶你下山。」有嫻解釋過後，志風也總算了解佢講麼个。

　　「耶！恁仔細！」有嫻歡喜靂天，按（on）算下二擺一定oi湊人共下來，正m̀會又撞走：「啊！吾手機仔mò電咧，若屋家有電腦mò？Ngài想oi用即時通同屋家人報平安。」

　　手機仔？電腦？即時通？

　　志風又發咄愕……

5. 　　月光華華，大家都睡忒咧！有嫻一儕人拿手電筒輕手輕腳行出去看夜景想事情，這下正九點零，佢仰睡仔落覺？出來行行較贏！

　　臥頭賞月，佢緊想緊試著當奇怪……

　　「范秋妹？這名仔仰異像識聽過？」

　　佢愐起護士小姐識喊這名仔。

　　敢講……佢he護士小姐？

　　「你ti做麼个？」志風擎等桐油火，發現佢坐ti樹下。

　　「該你又ti做麼ke？」有嫻分佢嚇著！

　　志高mò應佢，佢也坐下來，心事重重ke問：「你講你oi參加2010年桐花季？」

　　「He啊！」愛使特別講2010年？有嫻試著佢當奇怪。

　　「故所佢失敗咧？」志風噥噥噥噥yi像ti同自家講話。佢想確定一件事，當認真ke問有嫻：「妳識聽過厥名仔mò？佢乜he台北人！」

　　有嫻知佢問ke人he「范秋妹」，也當想lâu兩儕人牽線，但he佢m̀識有麼ke二十零歲ke細阿姐安這名仔。嚴格來講，這名仔根本he阿公阿婆年代ke嘛！

　　佢搖頭：「Ngài認識ke『范秋妹』he七十零歲ke阿婆，he吾阿姐婆，這下kha mò人安這名啦！」

　　志風像pûn電掣著：「妳……妳講麼个？佢he若阿姐婆？」

　　「唉唷！佢七十零歲咧啦！」M̀-he你oi尋ke人！盡尾該句話，佢mò講出來，驚佢傷心。

　　志風續恬恬mò講話，緊看月光。