《油桐花ke思念》

 | | | 轉寄

Tsun-kiêu-suí...圳溝水

作者 Hiû Yit-fàm....邱一帆 2010.08.01

Yit-kiok-thèu yit-kiok-thèu kói-hâ

一钁頭一钁頭改下

tsú-kûng ke hon-suí

祖公ke汗水

yit-pun-kî yit-pun-kî sṳ̀n-hí

一糞箕一糞箕承起

tsú-phò ke muk-tsṳp

祖婆ke目汁

Tshiùng suí-thèu theu-to suí-mî

從水頭透到水尾

yit-thiàu yit-thiàu kiên-nai ke suí-kiêu

一條一條艱耐ke水溝

yit-thiàu yit-thiàu yû-tshìn ke thièn-suí

一條一條有情ke田水

yim-tshut kí-tô tshiên-mok ke liòng-thièn

蔭出幾多阡陌ke良田

tshang-páu kí-tô-thoi-ngìn ke tú-sṳ́

撐飽幾多代人ke肚屎



Yit-kiok-thèu yit-kiok-thèu kói-hâ

一钁頭一钁頭改下

â-kûng ke hon-suí

阿公ke汗水

yit-pun-kî yit-pun-kî sṳ̀n-hí

一糞箕一糞箕承起

â-phò ke muk-tsṳp

阿婆ke目汁
Tshiùng thèu-pài theu-to liá-ha

從頭擺透到這下

yit-thiàu yit-thiàu ngin-miang ke tsun-kiêu

一條一條認命ke圳溝

yit-thiàu yit-thiàu sí-sîm ke thièn-suí

一條一條死心ke田水

tshiù tshiang-li liù-to ô-tsô

從淨利流到屙糟

tshiù yû-hi-théu liù-to mò-théu-hi

從yû氣透流到mò透氣