《戀戀台灣客家文學》

| | | 轉寄

態度

  一ke人,看佢會成功抑he失敗,看佢做事ke態度就知。假使做m̀著事情,一下就開聲大罵別人,m̀曉先檢討自家ke人,永遠m̀知自家奈m̀好。一ke會時時檢討自家ke人,正有進步ke機會。但he,假使佢曉得緊檢討自家,卻m̀曉得改進ke人,lsu5該只看得到別人缺點ke人共樣m̀會進步。

  這學期ngài有上多元文化教育課。同ngài上這門課ke人異少,kûi班只有十幾儕人,逐擺來上課ke人數也無定,下擺仔到七、八儕人定定。Ko,輒常盡準時上課ke人he先生,m̀-he學生仔。有一擺,先生tu-m̀-tiâu咧!Ti課堂上,問大家:「假使你he一ke頭家,你oi一ke能力當好ke人做員工?抑he一ke做事態度好ke人做員工?」先生看台下一片恬靜,自家自問自答:「假使ngài he一ke頭家,ngài寧願oi一ke有好態度ke人。因為一ke態度好ke人,ngài教佢,佢會聽入心,佢會緊學緊會;一ke能力好卻態度m̀好ke人,oi佢改變態度,該斯千難萬難,ngài奈有耐心教到佢改?」

  人講:「江山易改,本性難移。」態度ke養成he對人生歷練一點一滴培養起來,m̀-he講改就改。先生想提醒ên,做m̀得輕視生命每一刻,ti這下開始,就oi養成好ke態度。

  該樣仔正he好ke態度?

  無論對人抑he對事,ên都oi認真對待,虛心學習,時時檢討自家,時時改進。——恁呢就he好態度。

  聽起來斯異簡單,但he做得到ke人有幾多?

  想到這,ên實在oi好好檢討!千萬做m̀得因為好面子抑he懶屎性,害自家看m̀清楚問題ke徵結,總he一擺擺因為壞態度害自家不斷失敗、犯共樣ke錯誤。