《客語白話字聖經試讀版》

 | | | 轉寄

Yok-hon Fuk-Yîm, Thi-3-tsông_1 Yâ-sû lâu Nì-kô-tet-mu

作者 Hak-ngî Sṳn-kîn 2008.06.08

約 3:1 Yû yit-ke Fap-li-soi-ngìn, miàng ôn-to Nì-kô-tet-mu, he Yù-thai-ngìn ke liâng-siu (tsóng-tsá).
約 3:2 Liá-ke am-pû-sṳ̀ lòi kien Yâ-sû, tui Kì kóng: “Sîn-sâng, ngài-têu tî Ngì he tui Song-tsú ke-vi lòi ke kau-sṳ̂; na m̀-he Song-tsú lâu Ngì thùng-tshai, tshiu-mò ngìn voi tso ke-têu sṳ̀n-tsiak.”
約 3:3 Yâ-sû en kì kóng: “Ngài sṳ̍t-tshai lâu ngì kóng, ngìn na-he mò tshùng-sên, tshiu kien m̀-tó Song-tsú ke Kuet.”
約 3:4 Nì-kô-tet-mu tui Kì kóng: “Ngìn ló lé, ngióng-tet voi tshùng-sên? Kì voi tsai ngi̍p mû-thôi kiung tshut-lòi mé ?”
約 3:5 Yâ-sû en kóng: “Ngài sṳ̍t-tshai lâu ngì kóng, ngì na m̀-he tshiùng suí lâu Sṳn-Lìn lòi tshùng-sên, tshiu m̀-tet ngi̍p Song-tsú ke Kuet.”
約 3:6 Ngìn ke ngiuk-sṳ̂n he tui yà-ôi kiung ke, kì-ke lìn-sin he tui Sṳn-Lìn kiung ke.
約 3:7 Ngài lâu ngì kóng: ‘Ngì-têu pit-thin oi tshùng-sên, ngì m̀-voi kám-tó khì-kuai.’
約 3:8 Fûng suì kì-ke yi lòi tshôi, ngì thâng-tó kì-ke sâng, tsúng-he m̀ tî he tui nai-vi lòi, oi hi nai-vi; só-yû tui Sṳn-Lìn tshùng-sên ke ya-he án-ngiòng.”
約 3:9 Nì-kô-tet-mu tui Kì kóng: “Ngióng-voi yû liá-têu sṳ nò?”
約 3:10 Yâ-sû tui kì kóng: “Ngì tso Yî-set-lia̍t ke kau-sṳ̂, ya m̀ tî liá-têu sṳ mé?”
約 3:11 Ngài sṳ̍t-tshai lâu ngì kóng: “Ngài-têu só tî ke sṳ tsang kóng, só khon ke sṳ tsang tso-tsṳn; Ngài-têu ke tsṳn ngì-têu ya m̀-hén liâng-su.”
約 3:12 Ngài lâu ngì-têu kóng sṳ-kiên ke sṳ, ngì-têu hàn m̀ sin, na lâu ngì-têu kóng thiên-táng ke sṳ,ngì-têu ngióng-voi sin nò?
約 3:13 Mò ngìn yû sông-ko thiên, tsṳ́-yû tui thiên lo̍k-hâ-lòi ke Ngìn-Tsṳ́.
約 3:14 Tshiu-tshiong Mô-sî tshai khóng-yâ khià-hí thùng-sà, Ngìn-Tsṳ́ ya pit án-ngiòng phî ngìn khià-hí.
約 3:15 Sṳ́-tó sin Kì-ke ngìn tet yún-sên.
約 3:16 “Yîn-vi Song-tsú án-ngiòng oi sṳ-kie, só-yî tsiông Kì tshṳ-kâ ke Thu̍k-sên-tsṳ́ lòi su pûn kì-têu, sṳ́-tó sin-kho Kì-ke ngìn m̀-voi me̍t-mòng, fán-tsón tet yún-sên.”
約 3:17 “Yîn-vi Song-tsú tshâi Kì-ke Lai-é ngi̍p sṳ-kie, m̀-he oi sṳ́m-phan sṳ-kie; he-oi sṳ́ sṳ-kiên ke ngìn tet kiu.
約 3:18 Sin-kho Kì-ke ngìn tshiu-mò su sṳ́m-phan; m̀ sin ke ngìn yí-kîn su sṳ́m-phan, yîn-vi mò sin-kho Song-tsú ke Thu̍k-sên-tsṳ́.
約 3:19 Liá-ke tshiu-he sṳ́m-phan, tsit-he kông lòi-to sṳ-kie, sṳ-kiên-ngìn só tso ke sṳ he ok, ngìn tshiu hau am thai ko hau kông.
約 3:20 Yîn-vi tso fái-sṳ ke tshiu hen kông, ya m̀-lòi tsiap-khiun kông, kiâng kì só tso ke sṳ voi su tsit-phi.
約 3:21 Tsúng-he hàng tsṳ̂n-lî ke ngìn lòi tsiap-khiun kông, sṳ́-tó kì só tso ke sṳ voi hién-mìn, he tseu Song-tsú tsṳ́-yi lòi-tso.”