《客語白話字聖經試讀版》

 | | | 轉寄

Yok-hon Fuk-yîm, Thi-9-tsông_2 Fap-li-soi-ngìn Tsuî-kiu Mô-muk ke Sṳ

作者 Hak-ngî Sṳn-kîn 2009.01.11

約 9:13 Tsung-ngìn tshiu tai ke siên-ha mô-muk ke ngìn hi kien Fap-li-soi-ngìn.
約 9:14 Yâ-sû kiâu-nài yî-hó kì muk-tsû, ke-ngit he Ôn-sit-ngit.
約 9:15 Ku-só Fap-li-soi-ngìn ya tshai mun kì, kì he ngióng-pân khon-tó ke. Kì tshiu lâu kì-têu kóng: “Kì tsiông nam-nài kò ngài-ke sûng-muk, ngài tshiu khon-tet-tó.”
約 9:16 Yû-têu Fap-li-soi-ngìn kóng: “Liá-ke ngìn m̀-he tshiùng Song-tsú ke-vi lòi ke, yîn-vi Kì mò sú Ôn-sit-ngit ke kuî-thin,” m̀-ku yû phe̍t-ngìn kóng : “Tshui-ngìn ngióng-tet voi hàng án-ngiòng ke sṳ̀n-tsiak nò?” Kì-têu tshiu yîn-vi án-ngiòng lòi fûn-tsên.
約 9:17 Kì-têu Fap-li-soi-ngìn yu mun mô-muk ke ngìn kóng: “Kì ki-yèn yî-hó ngì-ke muk-tsû, ngì kóng Kì he ngióng-pân ke ngìn.” Kì en kóng: “Kì he yit-ke siên-tî .”
約 9:18 Ku-só ke-têu Yù-thai-ngìn tshiu m̀ sin kì siên-ha he mô-muk ke, liá-ha yí-kîn khon-tet-tó ; tén-to tsiông kì-ke yà-ôi tshìm-lòi.
約 9:19 Kì-têu mun kóng: “Liá-ke he ngì-têu ke lai-é he mò? Ngì-têu m̀-he kóng kì tshut-se tshiu mô-muk mâ? Kì liá-ha ngióng khon-tet-tó?”
約 9:20 Kì-ke yà-ôi en kóng: “Kì he ngài-têu ke lai-é. Ngài-têu tî kì tshut-se tshiu mô-muk.
約 9:21 Kì liá-ha ngióng khon-tet-tó, ngài-têu tshiu m̀ tî; he má-ngìn yî-hó kì-ke muk-tsû , ngài-têu ya m̀ tî; kì yí-kîn thai lé, ngì-têu mun kì, kì tshṳ-kâ voi lâu ngì-têu kóng.”
約 9:22 Kì-ke yà-ôi án-ngiòng kóng, he yîn-vi kiâng Yù-thai-ngìn ke liâng-siu, yîn-vi Yù-thai-ngìn ke liâng-siu yí-kîn kóng-hó, ká-sṳ́ yû ngìn sṳ̀n-ngin Yâ-sû he Kî-tuk, tshiu-oi tsiông kì kiuk-tshut fi-thòng.
約 9:23 Ku-só kì-ke yà-ôi tsang kóng: “Kì yí-kîn thai lé, ngì-têu hi mun kì.”
約 9:24 Kì-têu tshiu tsiông siên-ha mô-muk ke ngìn hêm-lòi, yu tui kì kóng : “Ngì yit-thin oi kóng sṳ̍t-fa,tshai Song-tsú ke mien-tshièn ; ngài-têu tî ke-ngìn he tshui- ngìn.”
約 9:25 Kì tshiu en kóng: “Kì he-m̀-he tshui-ngìn, ngài m̀ tî; ngài tî yit-khien sṳ, tshiu-he ngài siên-ha he mô-muk ke, liá-ha khon-tet-tó.”
約 9:26 Kì-têu yu mun kì kóng: “Kì lâu ngì tso-mak-ke sṳ? Ngióng-pân yî-hó ngì-ke muk-tsû ?”
約 9:27 Kì tshiu en kóng: “Ngài lâu ngì-têu kóng-ko, ngì-têu ya mò-oi thâng; tso-mak-ke liá-ha tshiu-oi thâng nè? Kám-kóng ngì-têu ya-oi tso Kiâ mùn-thù mâ?”
約 9:28 Kì-têu tshiu ma kì kóng: “Ngì he Kiâ mùn-thù; m̀-ku ngài-têu he Mô-sî ke mùn-thù.
約 9:29 Ngài-têu tî Song-tsú yû lâu Mô-sî kóng-ko fa; m̀-ku ke-tsak-ngìn ngài-têu m̀ tî Kì tshiùng nai-vi lòi ke.”
約 9:30 Ke ngìn tshiu en kì-têu kóng: “Liá tshiu khì-kuai lé. Kì yî-hó ngài-ke muk-tsû, tsúng-he ngì-têu m̀ tî Kì tshiùng nai-vi lòi ke.
約 9:31 Ngài-têu tî Song-tsú m̀ thâng tshui-ngìn ke khì-khiù; Kì tsṳ́-yû thâng ke kin-pai Kì, pin sṳ̍t-hàng Song-tsú tsṳ́-yi ke ngìn.
約 9:32 Tshóng-tsho sṳ-kie yî-lòi, tshut-se tshiu mô-muk ke, màng-sṳt thâng-ko yû ngìn yî-hó kì-ke muk-tsû.
約 9:33 Tshù-fî liá-ke ngìn he tshiùng Song-tsú lòi ke, kì mak-ke tû mò-fap tso.”
約 9:34 Kì-têu tshiu tui kì kóng: “Ngì tshut-se tshai tshui-ok-tsûng ke tûng-sî, ngióng-pân kám kau-hiun ngài-têu ?” Kì-têu tshiu tsiông kì kiuk-tshut fi-thòng.
約9:35 Yâ-sû thâng-tó kì-têu tsiông kì kiuk-tshut fi-thòng, tshiu tshìm-tó kì, mun kóng: “Ngì yû sin-kho Ngìn-Tsṳ́ mò?”
約9:36 Kì en kóng: “Tsú â ! Tshiáng lâu ngài kóng Ngìn-Tsṳ́ he má-ngìn, ngài tsang hó sin-kho Kì.”
約9:37 Yâ-sû lâu kì kóng: “Ngì yí-kîn khon-tó Kì, liá-ha lâu ngì kóng-fa ke tshiu-he Kì.”
約9:38 Kì tshiu kóng: “Tsú â ! Ngài sin.” Tshiu pai Kì.
約9:39 Yâ-sû tshiu kóng: “Ngài lòi liá sṳ-kie he-oi sṳ́m-phan, sṳ́ khon-m̀-to ke ngìn khon-tó, khon-tet-tó ke ngìn pien-tso mô-muk.”
約9:40 Tshai Kiâ sṳ̂n-piên, yû-têu Fap-li-soi-ngìn thâng-tó liá-ke fa, tshiu tui Kì kóng: “Kám-kóng Ngì tsiông ngài-têu ya khon-tso mo-muk ke mâ?”
約9:41Yâ-sû lâu kì-têu kóng: “Ngì-têu na-he mô-muk, ngì-têu tshiu mò tshui; m̀-ku ngì-têu liá-ha kóng : ‘Ngài-têu khon-tet-tó’; ngì-têu ke tshui tshiu tshûn-tshai ke.”