《客語白話字聖經試讀版》

 | | | 轉寄

Mâ-khó Fuk-yîm thi 5 tsông_02 Ya̍p-lû ke Moi-é lâu Hiet-leu ke Fu-ngìn-kâ

作者 Hak-ngî Sṳn-kîn 2014.02.09

5:21 Yâ-sû yu tshô-sòn to fù ke-phién, yû yit-thai-khiùn ngìn lòi tshîn-tshiu Kì.

5:22 Khon-â ! Yû yit-ke fi-thòng ke kón-lî-yèn, miàng ôn-to Ya̍p-lû, kì ya lòi; kì yit kien-tó Yâ-sû, tshiu phu̍k tshai Kì kiok-tshièn,

5:23 khiù Kì kóng : “Ngài-ke moi-é phiang-to voi sí,tshiáng Ngì lòi miâ kì ke sú, sṳ́ kì tet yî-hó, kiu kì yit miang!”

5:24 Yâ-sû lâu kì khiung-ha hi; yû yit-thai-khiùn ngìn ya thèn-tén Kì hi.

5:25 Yû yit-ke fu-ngìn-kâ, pot hiet-leu-phiang sṳ̍p-ngi-ngièn,

5:26 khon-ko tshin tô yî-sên, tshai kì-têu ke sú-hâ su tshin tô ke khú, kì só-yû ke tshièn-tshòi ya yung-thet-hi, kì ke phiang mò yî hó, fán-tsón kha ngiàm-tshung lé.

5:27 Kì sṳt thâng-ko Yâ-sû ke sṳ, kì tsiâm tshai ngìn-khiùn-tsûng, hàng tshai Yâ-sû ke heu-poi, tshiu miâ Kì-ke sâm.

5:28 Yîn-vi kì sióng: “Ngài ká-sṳ́ miâ-tó Kì-ke sâm, tshiu yit-thin tet yî-hó.”

5:29 Fu-ngìn-kâ ke hiet-leu tshiu thìn-tsṳ́; kám-kok tshṳ-kâ sṳ̂n-song ke phiang yí-kîn hó lé.

5:30 Yâ-sû tsit-sṳ̀ tî yû nèn-li̍t tshiùng Kì-ke sṳ̂n-song tshut-hi, tshiu tshai tsung-ngìn tsûng-kiên tsón-sṳ̂n ko lòi, kóng : “Má-ngìn miâ Ngài-ke sâm nò?”

5:31 Kià mùn-thù tshiu lâu Kì kóng : “Ngì khon tsung-ngìn tsiâm-tén Ngì, Ngì hàn mun : ‘Má-ngìn miâ Ngài’?”

5:32 Yâ-sû si-mien kín khon, má-ngìn miâ kì.

5:33 Fu-ngìn-kâ tî tshṳ-kâ sṳ̂n-song só fat-sên ke sṳ, kiâng to ki̍t-ki̍t-tsûn, tshiu lòi khuí-lo̍k tshai Yâ-sû mien- tshièn, tseu-sṳ̍t kóng pûn Kì tî.

5:34 Yâ-sû lâu kì kóng : “Moi-é á! Ngì-ke sin-sîm kiu-tó ngì; hó ôn-sîm tsón hi, ngì-ke phiang tet yî-hó lé.”

5:35 Yâ-sû hân tshai ke-vi kóng-fa ke sṳ̀-heu, yû ngìn tshiùng fi-thòng kón-lî-yèn ke vuk-hâ kón-lòi, kóng : “Ngì-ke moi-é sí-thet lé, hàn oi lò-thung Sîn-sâng nè?”

5:36 Yâ-sû m̀ kón kì só kóng ke fa, tshiu lâu kón fi-thòng ke kón-lî-yèn kóng : “M̀ sṳ́ kiâng, tân-tân oi sin.”

5:37 Yèn-heu kì tai-tén Pí-tet, Ngâ-kok, lâu Ngâ-kok ke ló-thâi Yok-hon khiung-ha hi, m̀ hén phe̍t-ngìn thèn-tén Kì-têu hi.

5:38 Kì-têu lòi-to fi-thòng kón-lî-yèn ke vuk-hâ, Yâ-sû khon-tó thai-kâ lon-tshàu-tshàu, yû ngìn thai-sâng kín keu.

5:39 Yâ-sû ngi̍p-hi tshiu lâu kì-têu kóng : “Ngì-têu ngióng-pân lon-tshàu-tshàu thai-sâng kín keu nò? Sè-ngìn-è mò sí, tshai ke-vi soi-muk thin-thin.”

5:40 Tsung-ngìn tshiu seu Kì. Tsúng-he Yâ-sû tsiông tsung-ngìn kiuk tshut-hi, tai se-ngìn-è ke yà-ôi, lâu thèn Kì lòi ke sâm-ke mùn-thù ngi̍p- hi se-ngìn-è ke fòng-kiên.

5:41 Yâ-sû tshiu khiên-tén se-â-moi-é ke sú, tshiu lâu kì kóng : “Thai-li-sâ, kú- mí”; yi-sṳ tshiu-he kóng : “Se-â-moi-é â! Ngài min-lin ngì hí-lòi.”

5:42 Se-â-moi-é tsit-sṳ̀ tshiu hí-lòi hàng; yîn-vi liá-ke sṳ, sṳ́ thai-kâ fî-sông hî-khì.

5:43 Yâ-sû ngiàm- ngiàm kim-tsṳ́ kì-têu, m̀ hó pûn phe̍t-ngìn tî liá-ke sṳ; yu fûn-fu nâ tûng-sî pûn se-â-moi sṳ̍t.