《客語白話字聖經試讀版》

 | | | 轉寄

Má-thai Fuk-yîm thi 24 tsông_03 Thai Tsâi-nan

作者 Hak-ngî Sṳn-kîn 2012.12.16

24:15 “Ngì-têu khon-tó siên-tî Tan-yî-lî só kóng ke-têu ‘Fí-me̍t-sin tet-ngìn-nâu ke tûng-sî’, khî tshai sṳ̀n-sṳn ke só-tshai ke sṳ̀ (thu̍k ke ngìn tshiu-oi mìn-pha̍k liá-ki fa ke yi-sṳ),
24:16 ke-sṳ̀, tshai Yù-thai thi-khî ke ngìn, oi tséu-hi sân-táng phit-nan;
24:17 tshai vuk-táng ke ngìn, m̀-hó hâ-lòi ngi̍p-hi vuk-tú nâ tûng-sî;
24:18 tshai thièn-tú ke ngìn, m̀-hó tsón-hi nâ kì-ke ngoi-sâm.
24:19 Ke-têu ngit-è, fài-thôi ke fu-ngìn-kâ, lâu pûn ô-ngâ-é sṳ̍t-nen ke â-mê tshiu tshám lé !
24:20 Ngì-têu tsho̍k oi khì-khiù Song-tsú, m̀-hó pûn ngì-têu tshai hòn-thiên, fe̍t tshai Ôn-sit-ngit phit-nan.
24:21 Yîn-vi ke-he pit yû ke thai tsâi-nan, tshṳ tshóng-tsho sṳ-kie yî-lòi,màng-sṳt yû án thai ke tsâi-nan, tsiông-lòi ya m̀-voi tsai yû.
24:22 Na Song-tsú m̀-tshièn kám-séu ke-têu tsâi-nan ke ngit-è, tshiu mò ngìn nèn tet kiu. Tsúng-he Kì vi-tsho̍k só kién-sién ke ngìn, Kì tshiu yit-thin voi kám-séu ke-têu ngit-è.
24:23 “Ká-sṳ́ yû ngìn lâu ngì-têu kóng : ‘Khon-â! Kî-tuk tshai liá-vi, fe̍t Kî-tuk tshai ke-vi,’ ngì-têu m̀-hó sin.
24:24 Yîn-vi tsiông-lòi yû ká Kî-tuk lâu ká ke siên-tî voi tshut-hien, kì-têu voi hàng thai sṳ̀n-tsiak lâu khì-sṳ; tshin kì só nèn lòi mì-fe̍t Song-tsú só kién-sién ke pak-siang.
24:25 Khon-â ! Ngài yû lâu ngì-têu siên kóng-ko lé.
24:26 “Na-he yû ngìn tui ngì-têu kóng : ‘Khon-â ! Kì he tshai khóng-yâ,’ngì-têu m̀-hó tshut-hi; ‘Khon-â! Kì he tshai vuk-tú,’ ngì-têu ya m̀-hó sin.
24:27 Yîn-vi tshiong ngiap-lang yit-yong, yit-ha-é tshiu tui thiên ke tûng-phién tseu-to sî-phién hi, liá pit-thin he Ngìn-tsṳ́ ke tsai-lìm án-ngiòng.
24:28 “Sṳ̂n-sṳ̂ tshai nai-vi, yîn-tiâu ya pit-thin tshai ke tshi-si̍p.