《客語白話字聖經試讀版》

 | | | 轉寄

Má-thai Fuk-yîm thi 20 tsông_01, Phù-thò-yèn ke Kûng-ngìn

作者 Hak-ngî Sṳn-kîn 2012.05.06

20:1 “Yîn-vi Thiên-kuet khó-pí liá-ke ku-sṳ: Yû yit-ke phù-thò-yèn ke tsú-ngìn tá-tsó tshut hi, tshiáng kûng-ngìn hi kì-ke phù-thò-yèn tso-sṳ.
20:2 Kì thùng kì-têu yok-thin yit-ngit ke kûng-tshièn he yit-tsak ngiùn-tshièn, tshiu ham kì-têu ngi̍p kì-ke phù-thò-yèn tso-sṳ.
20:3 Tsêu-sṳ̀n-thèu kiú-tiám-tsûng tsó-yu, kì yu hi sṳ-tshòng, khon-tó yû ngìn hàn-hàn khî tshai ke-vi.
20:4 Tshiu lâu kì-têu kóng : ‘Ngì-têu ya hi phù-thò-yèn tso-sṳ, ngài yung kûng-tong ke kûng-tshièn lòi pûn ngì-têu.’ Ke-têu ngìn tshiu hi.
20:5 Thai-yok tông-tsu sṳ̍p-ngi-tiám lâu hâ-tsu-thèu sâm-tiám-tsûng, kì yu tshut-hi, ya he án-ngiòng tshiáng têu kûng-ngìn lòi.
20:6 To hâ-tsu-thèu voi ńg-tiám-tsûng, kì yu tshut-hi, yu khon-tó yû ngìn hàn-hàn tshai ke khî, tshiu lâu kì-têu kóng : ‘Ngì-têu tso-mak-ke kuî-ngit hàn-hàn tshai liá khî nò?’
20:7 Kì-têu tui kì kóng : ‘Yîn-vi mò ngìn phín-tshiáng ngài-têu.’ Kì tshiu lâu kì-têu kóng : ‘Ngì-têu ya lòi phù-thò-yèn tso-sṳ.’
20:8 Tén to lìm-am lè, phù-thò-yèn ke tsú-ngìn tui kûng-thèu kóng : ‘Ham ke-têu kûng-ngìn lòi, fat kûng-tshièn pûn kì-têu, tshiùng tsui-mî ngi̍p-lòi ke siên pûn, tshṳ̍t-to tsui-siên ngi̍p-lòi ke.’
20:9 Ke-têu ńg-tiám-tsûng tsang tshièn lòi tso-sṳ ke, mî-yit-ke ngìn liâng-tó yit-tsak ngiùn-tshièn.
20:10 Ke-têu tsui-siên ngi̍p-lòi tso-sṳ ke ngìn, kì-têu siong kì-têu yit-thin liâng kha-tô; tsúng-he kì-têu ya he liâng yit-tsak ngiùn-tshièn.
20:11 Heu-lòi, kì-têu tshiu tui ke tsú-ngìn yû mài-yen,
20:12 kóng : ‘Ngài-têu kuî-ngit tshai lie̍t-ngit-hâ lò-khú, kì-têu tsui-mî lòi ke tân-tân tsang tso yit-tiám-tsûng kiú ke se, ngì ya pûn kì-têu lâu ngài-têu phiàng-tô ke kûng-tshièn.’ 20:13 Ke tsú-ngìn tui kì-têu khì-tsûng yit-ke-ngìn en kóng : ‘Phèn-yû â, ngài mò khuî-khiam ngì-têu. Ngì-têu tshièn m̀-he lâu ngài yok-thin hó, yit-ngìn ke kûng-tshièn he yit-tsak ngiùn-tshièn mâ?
20:14 Nâ ngì-ke kûng-tshèin tsón hi; ngài oi pûn tsui-mì lòi ke ngìn, thùng pûn ngì ke kûng-tshièn yit-yong.
20:15 Kám-kóng ngài mò khièn hó yung ngài tshṳ-kâ ke tshièn mâ? Yîn-vi ngài ke không-khói, ngì-têu tshiu ngién-tshak-tshak mâ?’ ”
20:16 Tsúng-he tsui-mì ke tsiông-oi tso thèu-tshièn, thèu-tshièn ke voi tso tsui-mì.