《客語白話字聖經試讀版》

 | | | 轉寄

Má-thai Fuk-yîm thi 19, chông_03, Heu-sâng Chhòi-chú ke Nàn-thì

作者 Hak-ngî Sṳn-kîn 2012.04.29

19:16 Khon â! Yû ngìn lòi kien Kì, kóng : “Sîn-sâng, ngài oi hàng mak-ke san-sṳ chang voi tet yún-sên?”
19:17 Yâ-sû lâu kì kóng : “Ngì ngióng-pân lòi mun Ngài koân-he ‘san’ ke sṳ nò? Chṳ́-yû yit-ke san ke ngìn. Ngì he ngien-yi oi lòi ngi̍p yún-sên, chhiu oi chûn-sú ke kie-min.”
19:18 Kì chhiu mun kóng : “ Mak-ke kie-min?” Yâ-sû chhiu kóng : “Chit he m̀ hó sat ngìn; m̀ hó hàng kiên-yìm; m̀ hó theû-nâ;m̀ hó cho ká kien-chṳn;
19:19 oi hau-kin ngì-ke yà-ôi; oi siak ngì-ke lìn-sa, chhiong siak ngì chhṳ-kâ án-ngiòng.
19:20 Ke-chak heu-sâng-ngìn tui Yâ-sû kóng : “Liá-teû kie-min, ngài yû chûn- sú , hàn oi cho mak-ke nò?”
19:21 Yâ-sû lâu kì kóng : “Ngì ká-sṳ́ ngien-yi oi cho vàn-chhiòn ke ngìn, chhiu hi mai-thet ngì só yû ke sán-ngia̍p, chiông chhièn lòi sung pûn khiùng-khú-ngìn, ngì chhiu yit-thin yû chhòi-pó chit-chhai Thiên-táng; yèn-heu ngì lòi thèn Ngài.”
19:22 Chúng-he ke heu-sâng-ngìn thâng-tó liá-ke fa, chhiu yù-seù lòi lì-khôi, yîn-vi kì ke sán-ngia̍p chhin tô.
19:23 Yâ-sû chhiu tui Kì-ke mùn-thù kóng : “Ngài sṳ̍t-chhai lâu ngì-teû kóng, yû-chhièn-ngìn oi ngi̍p Thiên-koet he chṳ̂n-nàn. 19:24 Ngài chai lâu ngì-teû kóng, lo̍k-thò chhôn-ko chṳ̂m-phi, pí yû-chhièn-ngin ngi̍p Song-ti ke koet hàn yùng-yi.”
19:25 Mùn-thù thâng-tó liá-ke fa, kì-teû chhiu thai-thai chho̍k-kiâng, kóng : “Chúng-he má-ngìn voi tet-kiu nò?”
19:26 Yâ-sû chhiu lâu kì-teû kóng : “Chhai ngìn liá-ke sṳ chhiu cho m̀ lòi; chúng-he chhai Song-ti, chhiu van-sṳ lúng-chûng cho-tet-lòi.”
19:27 Pí-tet chhiu tui Yâ-sû kóng : “Khon-hâ, ngài-teû yí-kîn sá-hi yit-chhiet lòi thèn Ngì; ngài-teû chiông-lòi voi tet mak-ke nò?”
19:28 Yâ-sû chhiu lâu kì-teû kóng : “Ngài sṳ̍t-chhai lâu ngì-teû kóng, ngì-teû yû thèn Ngài ke ngìn chhai chiông-lòi ke sîn sṳ̀-thoi ke sṳ̀-heu, Ngìn-chṳ́ chhô chhai Kì yùng-kông ke vi, ngì-teû ya pit-thin chhô chhai sṳ̍p-ngi ke pó-chho-song, lòi sṳ́m-phan Yî-set-lie̍t ke sṳ̍p-ngi kî-phai.
19:29 Ya put-lun má-ngìn, vi-chho̍k Ngài-ke miàng lòi piong-thet fòng-vuk, hiûng-thi, chí-moi,yà-ôi, chṳ́-ńg, fe̍t thièn-thi, chiông-lòi yit-thin voi tet pak-phi ke chióng-sóng, yu yit-thin voi tet yún-sên.
19:30 Chúng-he yû chhin-tô chhai theù-chhièn ke ngìn, chiông-oi cho heu-poi; yu chhai heu-poi ke ngìn, chiông-oi cho theù-chhièn.