《客語白話字聖經試讀版》

 | | | 轉寄

Má-thai Fuk-yîm thi 19, chông_01, Koân-he Hiû-chhî ke Kau-hiun

作者 Hak-ngî Sṳn-kîn 2012.04.15

19:1 Yâ-sû kóng-liáu liá-teû fa, chhiu lì-khôi Kâ-li-li, lòi to Yok-tan-hò tûng-phién ke Yù-thai thi-khî.
19:2 Yû yit thai-khiùn ngìn lòi kiên-chhiùng Kì; Yâ-sû chhai ke-vi chhiu yî-hó kì-teû tông-chûng ke phiang-ngìn.
19:3 Yû kí-ke Fap-li-soi-ngìn lòi kien Kì, tui Kì kóng : “Mò-lun mak-ke yèn-ku, ngài-teû ke fap-li̍t chún ló-kûng hiû-chhî mâ?”
19:4 Yâ-sû en kóng : “Ngì-teû chhièn màng sṳt thu̍k-ko liá-chham kîn-vùn he mò? Thai-chhû, Chhóng-chho-chú só chho ke ngìn, ‘yû nàm ya yû ńg.’
19:5 Yu kóng, ‘yîn-vi liá-ke yèn-ku, ngìn yit-thin oi lì-khôi kì-ke yà-ôi, lòi lâu pû-ngiòng kiet-ha̍p; lióng-ke ngìn chhiu sàng-chò yit-thí.’
19:6 Chhiong án-ngiòng, fû-chhî chhiu m̀-he lióng-ke ngìn, he yit-thí. Só-yî,Song-ti só phi-ha̍p ke, ngìn cho-m̀-tet fûn-khôi.”
19:7 Kì-teû chhiu chai tui Kì kóng : “Chúng-he, Mô-sî ngióng-pân fûn-fu kóng, cho ló-kûng ke siá yit-chông hiû-sû pûn pû-ngiòng chhiu cho-tet lòi hiû-thet kì?”
19:8 Yâ-sû tui kì-teû kóng : “Mô-sî he yîn-vi ngì-teû ke sîm chhin ngang, chhiu chún ngì-teû hiû-chhî; chúng-he chhai sṳ-kie chhóng-chho ke hí-theù chhiu m̀ he án-ngiòng.
19:9 Ngài lâu ngì-teû kóng , chhù-fî cho pû-ngiòng ke vì-fam chṳ̂n-chiet,lòi hiû-thet pû-ngiòng, mò-lun má-ngìn hiû-chhî, chhiùng-sîn lâu phe̍t ngìn kiet-fûn, chhiu he hàng kiên-yìm.
19:10 Ke-teû mùn-thù tui Yâ-sû kóng : “Ló-kûng lâu pû-ngiòng ke koân-he na-he án-ngiòng, chhiu m̀-sṳ́ kiet-fûn fán-chón kha-hó.”
19:11 Yâ-sû tui kì-teû kóng : M̀-he lúng-chúng ke ngìn voi chiap-su liá-chúng ke fa, chṳ́-yû tet-tó Song-ti thi̍t-phe̍t ên-su ke ngìn chang voi.
19:12 Yîn-vi ngìn mò kiet-fûn ke lî-yù chhin tô: Yû-teû he chhut-se chhiu kiet-fûn m̀-tet; ya yû-teû he ngìn-vì ke ngièn-ku mò kiet-fûn; hàn-yû yû-teû he vi-chho̍k Thiên-koet ke yèn-ku mò kiet-fûn. Cho-tet chiap-su ke ngìn chhiu chiap-su.”