《客語白話字聖經試讀版》

 | | | 轉寄

Yok-hon Fuk-yîm, Thi-6-tsông_1 Pûn Ńg-tshiên Ngìn Sṳ̍t-páu

作者 Hak-ngî Sṳn-kîn 2008.08.24

約 6:1 Liá-têu sṳ tsṳ̂-heu, Yâ-sû thu-ko Kâ-li-li-fù, tsit-he Thî-pí-lî-â-fû.
約 6:2 Yû yit-thai-khiùn ngìn lòi thèn-tén Kì,yîn-vi khon-tó Kì yî-phiang ke sṳ̀n-tsiak.
約 6:3 Yâ-sû tshiu sông-sân, lâu Kiâ mùn-thù khiung-ha tshai ke-vi tshô.
約 6:4 Ke-sṳ̀ Yù-thai-ngìn ke Yì-ye̍t-tsiet voi to lé.
約 6:5 Tsúng-he Yâ-sû ngo-thèu khon-tó yit-thai-khiùn ngìn lòi-to Kì mien-tshièn, tshiu tui Fî-li̍t kóng: “Ngài-têu oi tui nai-vi mâi sṳ̍t-vu̍t sṳ́ liá-têu ngìn yû hó sṳ̍t nò?”
約 6:6 Kì kóng liá-ke fa, he-oi tshṳ Fî-li̍t; yîn-vi Kì tshṳ-kâ tî oi ngióng-pân phan-lî.
約 6:7 Fî-li̍t en Kì kóng: “Tshiu-he yung lióng-pak-tsak ngiùn-tshièn mâi liòng-sṳ̍t , mî-yit-ke ngìn kok tet-tó yit-sit-sit-è, ya-he m̀-la.”
約 6:8 Kì mùn-thù tsûng nang-ngoi yit-ke ngìn, tshiu-he Sî-mùn Pí-tet ke hiûng-thi Ôn-tet-lie̍t, lâu Kì kóng :
約 6:9 “Yû yit-ke heu-sâng-ngìn tshai liá-vi, yû ńg-ke thai-ma̍k-piáng lâu lióng-mî ǹg-é,tsúng-he yung liá-têu lòi pûn án tô ngìn, ngióng-voi la nò?”
約 6:10 Yâ-sû kóng: “Hêm tsung-ngìn tshô-lo̍k-hi. (Tshai ke-vi yû tshin-tô tshó.)Thai-kâ tû tshô-lo̍k-hi, tân-tshiang ke-têu nàm-ngìn tshiu thai-yok yû ńg-tshiên ngìn ke su-muk.”
約 6:11 Yâ-sû tshiu nâ ke-têu liòng-sṳ̍t, kám-tshia Song-tsú yî-heu tshiu pûn ke-têu tshô-tén ke ngìn; ǹg-é ya-he án-ngiòng pûn, sṳ́ tsung-ngìn tet-tó só oi.
約 6:12 Kì-têu páu lé, Yâ-sû lâu Kiâ mùn-thù kóng: “Oi tsiông tshûn ke liòng-sṳ̍t sui-é ngiâm-hí-lòi, m̀-hó tá-sóng !”
約 6:13 Kì-têu tshiu tsiông ńg-tsak liòng-sṳ̍t ke sui-é, tshiu-he tsung-ngìn sṳ̍t tshûn ke ,ngiâm-hí-lòi, tsông-mân sṳ̍t-ngi-tsak làm-è.
約 6:14 Tsung-ngìn khon-tó Yâ-sû só hàng ke sṳ̀n-tsiak, tshiu kóng : “Liá-ke sṳ̍t-tshai he ke oi lòi ngi̍p-sṳ ke siên-tî.”
約 6:15 Yâ-sû tî tsung-ngìn oi khiòng-pet Kì lòi-tso vòng, Kì tshiu tsai tshṳ-kâ tân-thu̍k sám-hi sân-táng.