《客語白話字聖經試讀版》

 | | | 轉寄

Má-thai Fuk-yîm thi 15 tsông_01, Tsú-siên ke Tshòn-thúng

作者 Hak-ngî Sṳn-kîn 2011.12.11

15:1 Liá-sṳ̀, yû-têu Fap-li-soi-ngìn lâu Kîn-ho̍k kau-sṳ̂ tui Yâ-lu-sat-lâng lòi kien Yâ-sû, kóng :
15:2 “Ngióng-pân Ngì ke mùn-thù vì-poi tsú-siên ke tshòn-thúng nò? Yîn-vi kì-têu sṳ̍t-fan tshièn mò tseu kuî-kí sé-sú.”
15:3 Yâ-sû tui kì-têu yin kóng : “Ngì-têu tso mak-ke vi-tsho̍k tsûn-sú tshòn-thúng lòi vì-poi Song-ti ke min-lin nò?”
15:4 Yîn-vi Song-ti yû kóng : ‘ Oi hau-kin ngì-ke yà-ôi’ ; yu kóng : ‘ Tsu-ma ngì-ke yà-ôi, tshiu thin-tsho̍k oi phan kì sí-hìn.’
15:5 Ngì-têu phiên-phiên kóng, put-lun má-ngìn tui kì-ke yà-ôi kóng : ‘Ngài tsiông fung-yông ngì-têu ke tûng-sî tsún-tso lî-vu̍t hien pûn Song-ti’,
15:6 liá-ke ngìn tshiu yit-thin mò hau-kin kì-ke yà-ôi. Tshiong án-ngiòng, Ngì-têu he yîn-vi ngì-têu ke tshòn-thúng lòi fi-thet Song-ti ke tsṳ̂n-tho.
15:7 Ká-mo vì-san ke ngìn â, Yî-soi-â tsṳ́ ngì-têu só kóng ke yi-ngièn sṳ̍t-tshai mò m̀-tsho̍k, Kì kóng :
15:8 ‘Liá-têu ngìn yung tsoi-sùn lòi tsûn-kin Ngài; tsúng-he kì-têu ke sîm yèn-yèn lì-khôi Ngài.
15:9 Yîn-vi kì-têu yung ngìn ke kuî-thin tsún-tso Ngài ke min-lin lòi kâu ngìn,kì-têu kin-pai Ngài ya he khûng-khûng.’ ”