《客語白話字聖經試讀版》

 | | | 轉寄

Má-thai Fuk-yîm thi 14 tsông_03, Yâ-sû Hàng Suí-mien

作者 Hak-ngî Sṳn-kîn 2011.11.20

14:22 Yâ-sû ngiàm-sṳ̀ tshuî-tshuk Kì-ke mùn-thù sông-sòn, siên to tui-ngan hi, tén Kì ham tsung-ngìn tsón-hi..
14:23 Yâ-sû tén tsung-ngìn yí-kîn lì-khôi heu, tshṳ-kâ tshiu sông-sân hi khì-tó; to am-pû-thèu Kì tshṳ-kâ hàn liù tshai ke-vi.
14:24 Ke sṳ̀,sòn lì ngan yí-kîn tshin yén, pûn long tá-to vang-lòi vang-hi, yîn-vi sòn he ngia̍k-fûng hàng.
14:25 Thiên-mùng-kông ke sṳ̀, Yâ-sû hàng tshai fù-mien, lòi tshin-tshiu mùn-thù.
14:26 Mùn-thù khon-tó Yâ-sû hàng tshai fù-mien, tshiu tsho̍k-kiâng, kóng : “He kuí !” Kì-têu tshiu kiâng to hêm hí-lòi.
14:27 Yâ-sû tsit-sṳ̀ tshiu tui kì-têu kóng: “Ngì-têu ôn-sîm,he Ngâi, m̀ sṳ́ kiâng !”
14:28 Pí-tet en Kì kóng : “Tsú â, na tsṳn-kîn he Ngì, tshiu hó min-lin ngài hàng tshai suí-mien lòi tshin-tshiu Ngì.”
14:29 Yâ-sû kóng : “Lòi !” Pí-tet tshiu tui sòn-táng hâ-hi, hàng tshai suí-mien, lòi tshin-tshiu Yâ-sû.
14:30 Tsúng-he, yîn-vi khon-tó fûng tshin thai, tshiu tsho̍k-kiâng, tshiu khôi-sṳ́ tshṳ̀m-tén hâ-hi;kì tshiu fû-ham kóng : “Tsú â, kiu ngài.”
14:31 Yâ-sû ngiàm-sṳ̀ tshûn-sú lâi-tén kì, lâu kì kóng : “ Ngì ke sin-sîm sṳ̍t-tshai thet se, tso mak-ke fù-ngì nò?”
14:32 Kì-têu yit-ha sông sòn, fûng tshiu thìn hâ-lòi.
14:33 Tshai sòn-táng ke ngìn tshiu khuí-pai Yâ-sû, kóng : “Ngì sṳ̍t-tshai he Song-ti ke Tsṳ́.”