《客語白話字聖經試讀版》

 | | | 轉寄

Má-thai Fuk-yîm thi 11 tsông_01, Sṳ̂-sé Yok-hon Phai Ho̍k-sâng Lòi Kien Yâ-sû

作者 Hak-ngî Sṳn-kîn 2011.04.17

11:1 Yâ-sû fûn-fu Kì sṳ̍p-ngi ke mùn-thù liáu heu, tshiu lì-khôi ke thi-fông, tshai fu-khiun ke kok hiông-tsṳ́n lòi kau-hiun ngìn pin siên-tshòn fuk-yîm.
11:2 Yok-hon tshai kâm-ngiu̍k thâng-tó Kî-tuk só hàng ke sṳ, tshiu phai kì-ke mùn-thù lòi kien Yâ-sû, mun Kì kóng:
11:3 “Ngì tshiu-he ke mò kí-kiú oi lòi ke, ya-he ngài-têu hàn oi tén phe̍t-ngìn nò?”
11:4 Yâ-sû tshiu en kì-têu kóng : “Ngì-têu tsón hi, tsiông ngì-têu só khon-tó ke sṳ kóng pûn Yok-hon tî,
11:5 tshiu-he: Mô-muk ke ngìn khon-tó, pài-kiok ke ngìn voi-hàng, mà-fûng ke ngìn tet tshiang-li, ngí-lûng ke ngìn thâng-tó, sí-ngìn fán-sâng, khiùng-khú ke ngìn thâng-tó fuk-yîm.
11:6 Thai-fàm mò ngì-fù Ngài ke ngìn, liá-ke ngìn tshiu yû fuk.”
11:7 Yok-hon ke ho̍k-sâng lì-khôi heu, Yâ-sû tui tsung-ngìn kóng-hí Yok-hon, Kì kóng: “Ngì-têu hi khóng-yâ, sióng oi khon mak-ke nò? He khon ngiòng-phò pûn fûng tshôi thîn-thûng mâ?”
11:8 Ngì-têu tshut-hi he oi khon mak-ke nò? Hi khon ngìn tsok tsiâng-sâm mâ? Tsúng-he tsok tsiâng-sâm ke ngìn he he̍t tshai vòng-kiûng.
11:9 Án-ngiòng, ngì-têu tshut-hi he vi-tsho̍k mak-ke nò? He oi khon siên-tî mâ? Ngâi lâu ngì-têu kóng, tsúng-he Kì pí siên-tî hàn-kha thai.
11:10 Liá-ke ngìn tshiu he Sṳn-kîn só ki-tsai ke ngìn, Song-ti kóng : ‘Khon-â! Ngài tshâi-khién Ngài ke sṳ́-tsá tshai Ngì mien-tshièn, kì oi vi Ngì khôi-lu.’”
11:11 Ngâi sṳ̍t-tshai lâu ngì-têu kóng : “Thai-fàm sṳ-kiên mò ngìn pí Sṳ̂-sé Yok-hon kha ví-thai, tsúng-he tshai Thiên-kuet tông-tsûng tsui mì-se ke, hàn thai-ko liá-ke ngìn.
11:12 Tui Sṳ̂-sé Yok-hon tshòn-tho to kîm, Thiên-kuet yû su-tó phau-li̍t ke kûng-kit, khiòng-phau ke ngìn sióng-oi tshióng Kì.
11:13 Yîn-vi só-yû siên-tî lâu li̍t-fap yû yi-ngièn tshṳ̍t-to Yok-hon.
11:14 Na ngì-têu he hén sṳ̀n-su Kì-têu ke yi-ngièn, Yok-hon tshiu-he ke oi lòi ke Yî-li-â.
11:15 Yû ngí-kûng hó thâng ke ngìn tshiu oi thâng.
11:16 “Liá-ke sṳ-thoi ke ngìn,Ngài oi yung mak-ke lòi pí-yi? He tshiong se-ngìn-é tshô tshai sṳ-tshòng, tui kì-têu ke thùng-phân hêm kóng:
11:17 ‘Ngài-têu vi ngì-têu phùn fûn-lî ke kô-khiuk, ngì-têu m̀ thiau-vú; ngài-têu tshong sông-lî ke ôi-kô, ngì-têu ya m̀ keu.’
11:18 Yin-vi Yok-hon lòi, m̀ sṳ̍t, ya m̀ lîm, ngìn tshiu kóng: ‘Kî he pûn kuí fu-sṳ̂n lê.’
11:19 Ngìn-tsṳ́ lòi, ya sṳ̍t ya lîm, ngìn tshiu kóng : ‘Khon-â! Kì he hau-sṳ̍t hau-tsiú ke ngìn, he soi-kun lâu fái-ngìn ke phèn-yû !’ Tsúng-he,tsṳ̂n-sṳ̍t ke tsṳ-fi he yung Kì ke kiet-kó lòi hién-mìn ke.”